Diputadonan Jennifer Mohamedjoenoes i Dennis Martinus a papia ku representantenan di Piskabon tokante e desaroyonan i desafionan den e sektor di peska na Boneiru. Durante e kòmbersashon entre otro sosten pa piskadónan, ehekushon di proyektonan i fasilidat pa boto di piskadó a bini dilanti.
Piskamentu i piskadónan ta forma un parti importante di Boneiru i e ta hunga un ròl importante den nos ekonomia. Durante e konsulta nan a papia tokante importansia di aktividatnan di Piskabon ku ta sostené e sektor, entre otro ponementu tur aña di Fish Aggregating Devices (FAD’s), ku ta atraé piska pa fasilitá nos piskadónan i organisamentu di kompetensia di piskamentu.
Banda di esaki ámbos partido a deliberá tokante finansiamentu di proyektonan di piskamentu i kontinuidat di sosten di parti di Entidat Públiko Boneiru. Den esaki nan a papia tambe tokante e kontrato di kuido eksistente ku tin ocho aña kaba andando i tokante e deseo di Piskabon pa hisa e kontribushon finansiero. E posibilidatnan pa mehorá e ‘slipway’-nan tambe a bin dilanti.
“Nos ta haña importante pa sigui papia ku tur e partidonan embolbí pa asina nos por traha huntu riba un mihó futuro pa e sektor di peska na Boneiru.” diputado Dennis Martinus a indiká.








