Entidat Públiko Boneiru ta trahando riba un plan pa drecha kamindanan di tera den barionan

Diputado Dennis Martinus riba djabièrnè 2 di òktober a papia ku ministerio di Infrastruktura i Maneho di Awa tokante e programa di kayanan di Boneiru. Durante e konsulta a papia entre otro tokante e kamindanan di tera den barionan eksistente. Entidat Públiko Boneiru ta bai elaborá e tarea akí den e plan di kaminda.

“Bon kaminda ta nesesario pa bida diario. Habitantenan mester por alkansá nan bibienda, nan skol i nan trabou na un manera seif sin molèster debí na stòf, lodo i awa.” diputado Martinus ta enfatisá.

Den e plan, Entidat Públiko Boneiru ta identifiká kua ta e kamindanan ku mester atendé kuné, kiko e prioridatnan i e gastunan ta i pa kua trabou tin mester di finansiamentu ainda. E plan ta forma e base pa kòmbersashonnan mas aleu ku Reino tokante finansiamentu adishonal.

Ta inkluí tambe mantenshon, desagwe i siguridat di tráfiko. Kaminda esaki ta posibel ta wak tambe espasio pa peaton i siklista. Pa e motibu akí Entidat Públiko Boneiru ke duna un bista mas kla di e kamindanan ku ta bai atendé kuné i kiko e planifikashon ta.

Asina ku a elaborá e plan di kaminda komplementá mas aleu, ta kontinuá ku e konsulta ku ministerio di Infrastruktura i Maneho di Awa.