Dia 10 di òktober tabata Dia Mundial di Salú Mental. Riba e dia akí rònt mundu nan ta pidi atenshon pa salú mental i importansia di komprenshon i sosten, i pa hasi posibel pa papia tokante problema mental.
Salú mental ta importante pa tur hende. Tòg no tur ora ta visibel ki ora un hende ta pasando den momentunan difísil. Pa e motibu akí Entidat Públiko Boneiru ke enkurashá habitantenan pa tira bista pa otro, skucha otro i papia abiertamente tokante kon realmente un hende ta sinti su mes.
Gezaghèber John Soliano ta pone énfasis riba importansia di un komunidat kaminda hende ta sinti ku ta skucha i sostené nan.
“Na nos islanan nos konosé otro. Netamente pa e motibu akí ta importante pa nos dediká atenshon na otro. Tin ora parti pafó bo no ta mira kiko hende pa pasando aden parti paden.
P’esei ta bon pa nos papia mas tantu ku otro. Laga nos skucha sin husga. Laga nos pidi yudansa ora esaki ta nesesario. I laga nos kòrda otro ku niun hende no tin mester di karga su preokupashonnan su so. Pa e motibu akí komo gezaghèber mi no ke pidi solamente atenshon pa salú mental, pero tambe pa speransa, komprenshon i apoyo. Mi ta skucha. Mi ta komprendé. Mi ta apoyá. Huntu nos ta edifiká un komunidat kaminda ta normal pa papia tokante kon realmente bo ta sinti bo mes.”
Huntu nos por traha pa logra un komunidat kaminda tur hende ta sinti su mes seif pa papia tokante su sintimentunan.