Entidat Públiko Boneiru, Tourism Corporation Bonaire (TCB) i Bonaire Hotel and Tourism Association (BONHATA) a firma un Memorandum of Understanding (MoU). Den e MoU akí e tres partidonan ta ekspresá nan intenshon pa traha huntu, den e próksimo tres añanan, riba un vishon kompartí i regenerativo riba turismo pa Boneiru.
Turismo ta representá aproksimadamente 50 porshento di e produkto interno bruto; e entrada di belasting turístiko na 2025 tabata mas o ménos USD 16,9 mion. Alabes e sektor ta enfrentá desafionan ku ta eksigí un bon ekilibrio entre kresementu ekonómiko, konservashon di naturalesa i kalidat di bida pa e habitantenan.
E partidonan ta traha huntu riba tres tema:
- Boneiru komo destinashon prepará pa futuro, ku kapasidat di nos isla pa wanta preshon aheno komo kondishon pa kresementu;
- desaroyo i garantia di konekshonnan aéreo internashonal;
- uso óptimo i transparente di medio públiko i privá, inkluyendo eksplorashon di un modelo di finansiamentu struktural pa TCB.
Konkretamente, e partidonan ta reuní minimalmente un bes kada trimèster, nan ta instalá un grupo di trabou pa kada tema i dentro di seis luna nan ta tradusí e MoU den un plan di akshon ku meta midibel. E akuerdo tin un durashon di tres aña i ta evalu’é tur aña. Den e trayekto akí TCB ta desaroyá i bira un organisashon di maneho di destinashon i ta formulá e Tourism Vision & Roadmap 2027–2037, ku Entidat Públiko Boneiru i BONHATA den e ekipo núkleo for di kuminsamentu. E MoU no ta hurídikamente vinkulante; partinan ku ta trese konsekuensia pa Entidat Públiko Boneiru ta rekerí un desishon separá di e órgano kompetente.
Jennifer Mohamedjoenoes, Diputado di Finansa i Turismo:
“Nos ke traha pa logra un turismo ku ta agregá balor na Boneiru: ekilibrio entre ekonomia, naturalesa i kalidat di bida, mihó alkansabilidat i un kolaborashon fuerte ku nos empresarionan. E akuerdonan mester bira visibel awor den maneho i implementashon.”
Elesiër Angel, direktor di Tourism Corporation Bonaire:
“E kolaborashon akí ta yuda nos transformá nos ambishonnan komun den akshonnan konkreto. Asina nos ta traha riba un turismo ku ta fortalesé nos ekonomia, protehá nos naturalesa i krea balor pa nos komunidat.”
Veroesjka de Windt, direktor di BONHATA:
“Nos ta firma e MoU aki pasobra diálogo struktural ku Entidat Públiko Boneiru i TCB ta estriktamente nesesario: turismo ta karga mitar di nos ekonomia i e ta bou di preshon. Loke e diálogo aki mester produsí na promé lugá ta transparensia riba kon ta gasta entrada di e impuesto di turista.”
Konsehero Jolinda Craane a boga pa konsulta rápido i struktural entre gobièrnu i sektor turístiko: “E kolaborashon aki ta un bon promé paso, pero loke ta mas importante ta pa kombertí e palabrashonnan den resultadonan konkreto.”
