Den e periodo tras di lomba Entidat Públiko Boneiru a tuma desishonnan importante i a ehekutá vários proyekto riba diferente tereno. Ta trata di entre otro medidanan pa limitá e kosto di bida ku ta oumentando, i di invershon den infrastruktura, maneho di sushi, sosten sosial i transporte públiko. Ku esaki Entidat Públiko Boneiru ta trahando pa logra mihó sirkunstansianan di bida pa habitantenan di Boneiru.
Na diferente sitio na Boneiru nos ta laga drecha kaminda i mehorá desagwe. Nos a invertí tambe den mihó fasilidatnan pa e sektor lokal di peska. Via Regio Deal Boneiru nos ta invertí den infrastruktura rònt di skol, den panel solar na e skolnan básiko i den desaroyo di área. Mas aleu nos ta fortifiká maneho di sushi ku vehíkulonan nobo pa Selibon i ku desaroyo di fasilidatnan nobo pa sushi. Na mes momentu nos ta trahando riba un sistema di transporte públiko struktural ku na kuminsamentu di aña 2027 mester ta disponibel pa tur habitante.
Entidat Públiko Boneiru a pone medionan finansiero disponibel pa nos habitantenan pa kubri e gastunan di koriente ku ta oumentando. Pa medio di e programa di Trabou, Bienestar i Prosperidat (Werk, Welzijn en Welvaart – WWW), nos ta trahando pa logra mas oportunidat pa trabou i independensia finansiero pa nos habitantenan. Kolegio Ehekutivo a disidí pa lanta Fundashon Trabou Inklusivo Boneiru, e futuro Empresa pa Trabou Sosial. Nos ta trahando tambe riba un Areglo pa Hende ku Entrada Abou i riba mehorashon di ayudo pa hende ku tin problema ku debe. Banda di esaki Entidat Públiko Boneiru ta invertí den profeshonalisashon di su propio organisashon, ku mehoransa den prosesonan finansiero i atministrativo, dunamentu di pèrmit, i supervishon i mantenshon di lei, pa por duna nos habitantenan mihó servisio.
E desaroyonan akí ta forma parti di ehekushon di e Akuerdo Atministrativo i otro plannan importante pa Boneiru. Den e periodo tras di lomba nos no a logra solamente resultadonan konkreto, pero nos a traha tambe riba proyektonan ku den e temporada binidero ta sigui haña forma. Kolegio Ehekutivo ta sigui komprometé su mes pa realisá e plannan akí i di e manera akí mehorá kalidat di bida na Boneiru.
Den e periodo nos dilanti, Entidat Públiko Boneiru lo sigui informá nos komunidat tokante progreso di e diferente proyektonan i kiko nos habitantenan por verwagt di esakinan.





