Entrante promé di novèmber 2026 Christopher Frans ta tuma despedida komo secretario insular di Entidat Públiko Boneiru. Frans a ehersé e funshon aki for di promé di maart 2023 i el a disidí pa aseptá un reto nobo.
Frans ta trahando for di desèmber 2013 na Entidat Públiko Boneiru i den e añanan tras di lomba el a desempeñá diferente funshon. E tabata entre otro konsehero di maneho senior na direktorado di Komunidat i Kuido, konsehero atministrativo na Gabinete di Gezaghèber i sekretario insular athunto, promé ku na aña 2023 el haña nombramentu komo sekretario insular.
Komo sekretario insular Frans tabata responsabel pa dunamentu di guia na e organisashon públiko, i asesoramentu i sosten di Kolegio Ehekutivo.
Ku apresio Frans ta wak bèk riba su tempu na Entidat Públiko Boneiru. Aunke no tabata un desishon fásil, e ta anhelá su reto nobo.
“Ku hopi apresio mi ta wak bèk riba e kolaborashon ku mi koleganan. Mi ta agradesido na Kolegio Ehekutivo i Konseho Insular pa e konfiansa, i na e organisashon públiko pa e sosten i kolaborashon durante e último añanan. Huntu nos a komprometé nos mes pa nos organisashon i pa Boneiru. Mi ta spera ku tur hende ta sigui traha duru ku e mesun enbolbimentu, kaminda interes general di nos komunidat semper ta na promé lugá”, segun Frans.
Na nòmber di Entidat Públiko Boneiru, Kolegio Ehekutivo ta ekspresá su apresio pa e kompromiso i enbolbimentu di hopi aña largu di Christopher Frans. Kolegio Ehekutivo ta gradisí Frans pa su aporte na desaroyo di e organisashon Públiko i pa e kolaborashon den e añanan tras di lomba. Kolegio Ehekutivo ta deseá Frans hopi éksito i tur kos bon ku kontinuashon di su karera.
Remplaso temporal di sekretario insular
For di promé di novèmber 2026 sekretario insular suplente Roxanne Francees ta aktua komo sekretario insular interino.
