For di 24 te ku 31 di òktober mundialmente e Global Media and Information Literacy Week (Siman Mundial di Abilidat relashoná ku Medionan di Komunikashon i Informashon) ta tuma lugá. E siman akí ta pone énfasis riba importansia di e abilidatnan ku hende tin mester pa haña, evaluá i komprendé informashon, i kompartí esaki na un manera responsabel.
Den un tempu kaminda informashon ta plama rápidamente pa medio di medionan sosial i plataformanan digital, ta importante pa kontrolá fuente i hasi distinshon entre echo, opinion i informashon engañoso. Pa e motibu akí Entidat Públiko Boneiru ta enkurashá habitantenan pa pensa na un manera krítiko promé ku nan kompartí mensahe.
Informashon konfiabel mester ta komprendibel i aksesibel tambe pa tur hende. Komunikashon multilingual, entre otro komunikashon na papiamentu, ta kontribuí na un situashon kaminda habitantenan por partisipá na e kòmbersashon públiko.
“Tur hende ta hunga un ròl den kombatimentu di informashon engañoso. Pa medio di kontrolá fuente, pensa na un manera krítiko i kompartí informashon na un manera responsabel, nos ta fortifiká konfiansa i konektividat den nos komunidat”, segun diputado di Komunidat i Kuido Timoteo Silberie.
Den esaki skolnan, organisashonnan kultural, organisashonnan di hóben i medionan di komunikashon por hunga un ròl importante. Nan por sostené habitantenan na momentu di desaroyá abilidat digital, pensa na un manera krítiko i hasi uso responsabel di medionan di komunikashon.
Kontrolá e fuente. Pensa na un manera krítiko. Kompartí na un manera responsabel. Huntu nos ta edifiká un Boneiru bon informá i konektá.
