Dia 4 i 5 di novèmber 2026 Entidat Públiko Boneiru ta partisipá na e kumbre di klima ‘Gebouwde Omgeving 2026’. Durante e enkuentro akí gobièrnunan, institutonan di konosementu i profeshonalnan ta bini huntu pa interkambiá konosementu i eksperensia tokante temanan manera konstrukshon sostenibel, adaptashon na klima, desaroyo naturalesa inklusivo i un ambiente di biba resiliente pa futuro.
Na nòmber di Boneiru, Carlos J.J. Pourier, konsehero di maneho Ordenamentu Teritorial i Bibienda Popular na Entidat Públiko Boneiru, ta bai partisipá na e kumbre. Pa medio di e partisipashon akí Boneiru ke optené konosementu tokante desaroyonan inovativo i bon ehèmpelnan di práktika riba tereno di konstrukshon naturalesa inklusivo i sostenibel. E konosementu akumulá por kontribuí na desaroyo mas aleu di maneho i proyektonan ku ta enfoká riba un strukturashon sostenibel i resiliente pa klima di nos isla.
Banda di esaki e kumbre di klima ta brinda oportunidat pa establesé kontakto i traha huntu ku organisashonnan i ekspertonan den Reino Hulandes ku ta okupá nan mes ku desafionan teritorial i sosial similar.
Ku su partisipashon Entidat Públiko Boneiru ta suprayá importansia di konstrukshon responsabel i sostenibel. Boneiru ke stimulá kompanianan lokal di konstrukshon, desaroyadónan i otro partidonan envolví pa kada bes dediká mas atenshon na sostenibilidat, resiliensia pa klima i konservashon di balornan natural na momentu di desaroyonan nobo.
Entidat Públiko Boneiru ta mira konstrukshon sostenibel i naturalesa inklusivo komo un kondishon esensial pa un Boneiru resiliente pa futuro. E partisipashon na e kumbre di klima ‘Gebouwde Omgeving 2026’ ta brinda un oportunidat balioso pa optené konosementu nobo i tradusí esaki den práktika na nos isla, huntu ku kompanianan lokal di konstrukshon, desaroyadónan i otro partnernan. Di e manera akí por traha riba un espasio ku konstrukshon ku no solamente ta reakshoná riba e desafionan di kambio klimatológiko, sino ku ta kontribuí tambe na kalidat di bida, biodiversidat i desaroyo sostenibel di Boneiru.
Despues ku e kumbre di klima finalisá lo kompartí e konosementu i eksperensianan mas prinsipal den e organisashon i ku e stakeholdernan relevante na Boneiru.