Entidat Públiko Boneiru a tene riba 4 di novèmber 2026 loting pa otorgamentu di 60 tereno na èrfpagt según un lista di espera, destiná pa personanan ku a indiká nan nesesidat di un tereno durante periodo 2010 i 2011.
E loting a tuma lugá komo parti di e proseso di atendé petishonnan di personanan ku durante e añanan menshoná a registrá nan interes pa optené un tereno pa konstrukshon di nan propio bibienda. E repartishon a tuma lugá mediante un sistema di loting, bou di supervishon di un notario, ku e propósito pa garantisá un proseso transparente, hustu i ophetivo pa tur partisipante.
Durante e loting a determiná kua tereno ta keda asigná na kada partisipante. E asignashon aki ta un paso den e proseso, pero no ta nifiká ku e derecho definitivo di èrfpagt ta otorgá outomátikamente. Tur persona ku a risibí un tereno mediante e loting mester pasa ainda pa un proseso di verifikashon pa determiná si e ta kumpli ku e rekisitonan nesesario pa por risibí e derecho ofisial di èrfpagt.
Entre e rekisitonan ta konta ku e interesado mester por demostrá ku tin kapasidat finansiero pa realisá konstrukshon di un bibienda, di akuerdo ku norma i reglamentu di konstrukshon vigente na Boneiru. Ademas, e persona no mester tin un tereno na su nòmber, sea di propiedat, huurgrond ku destinashon bibienda òf èrfpagt. Den kaso si e persona ta kasá, e kondishon aki ta relevante tambe pa e esposo òf esposa. E interesado mester ta residente di Boneiru i tereno ta destiná eksklusivamente pa uso di bibienda propio, i no pa finnan komersial.
Ku e loting aki, Entidat Públiko Boneiru ta duna un siguiente paso den e proseso di atendé petishonnan ku a keda pendiente durante hopi aña. E siguiente fase lo konsistí den e verifikashon di e dokumentashon i rekisitonan di kada persona promé ku por sigui ku e otorgamentu definitivo di e derecho di èrfpagt.
Entidat Públiko Boneiru ta reafirmá su kompromiso pa sigui atendé e proseso aki di forma transparente, ku igualdat di tratamentu i na interes di komunidat di Boneiru.
