Resientemente seis suidadano a risibí Kondekorashon Real for di mannan di Gezaghèber Interino sr. Reynolds “Nolly”Oleana.
Ta trata aki di sra. Esther J. Bernabela – Ridder in de Orde van Oranje-Nassau, sr. Franklin D. “Boi” Antoin – Officier in de Orde van Oranje-Nassau, sr. Angelo H. Domacassé – Lid in de Orde van Oranje-Nassau, sr. Harlton E. “Onnie”Emerenciana – Ridder in de Orde van Oranje-Nassau, sr. Byron A. “Boei” Tromp – Ridder in de Orde van Oranje Nassau i sr. Martinus W. A.van der Valk – Ridder in de Orde van Oranje-Nassau.
Un kondekorashon ta un símbolo di rekonosementu na un persona pa su aporte personal, òf algu ekstraordinario pa komunidat.
Tur hende por proponé un kandidato ku por bini na remarke pa un kondekorashon real. Pa manda un nòmber aden mester yena un formulario i motivá dikon e persona lo mester bini na remarke pa e haña un kondekorashon. Pa risibí e formulario i mas informashon por tuma kontakto ku miembronan di Komishon Kondekorashon na decoratiecommissie@bonairegov.com òf decoratiecommissiebonaire@gmail.com.
Esun ku ta manda un proposishon aden mester tin pasenshi. E por dura un par di luna promé ku e ta kla. Ta importante pa entregá e informashon na tempu pa asina por prosesá e informashon na tempu. Pa promé di sèptèmber e proposishonnan mester ta den man di gezaghèber. P’esei ta importante pa entregá e petishonnan no mas tarda ku fin di yüni asina entidat públiko tambe por pidi informashon adishonal ku nan tin mester manera e papel di bon kondukta.
Entidat Públiko Boneiru ta manda palabranan di felisitashon na e seis personanan ku a risibí e kondekorashon real
