Despues di un renobashon largu, nos matadero a habri su portanan. E renobashon tabata un inisiativa konhunto di entidat públiko Boneiru (EPB) i ministerio di Agrikultura, Naturalesa i Kalidat di Kuminda (LNV). E reapertura akí ta marka un paso importante padilanti.
Aspektonan di siguridat i fasilidatnan mehorá
Reapertura di e matadero ta marka un era nobo. Awor ta posibel pa mata diferente tipo di bestia ku aparatonan moderno. Banda di esaki e matadero awor tin un ofisina ekipá den forma moderno pa e tim veterinario.
Tributo na e inisiadó Christianne Bruschke
E proyekto ta representá tambe un grato rekuerdo di Christianne Bruschke, kende tabata inisiadó di e proyekto akí. Su esfuerso i dedikashon tabatin un impakto permanente, aunke desafortunadamente e mes no por a mira kon su vishon a bira realidat. Na honor di su legado a pone un banki dilanti di e matadero.
Rekonosementu di dedikashon
Komo muestra di apresio pa dedikashon di e personal, 5 miembro di e departamento a risibí un regalo spesial serka hefe di e departamento veterinario Claire Cointepas. Nan dedikashon i profeshonalidat a kontribuí na éksito di e proyekto akí.
Seremonia i diskurso
Durante un seremonia solèm, kondusí pa señor Sint Jago, diferente orador a papia tokante importansia di kalidat di kuminda i promoshon di produkshon di kuminda lokal. Entre e oradornan tabatin entre otro e hefe di departamento di Agrikultura, Krio di Bestia i Peska (LVV) Maurice Adriaens, representante di ministerio di Agrikultura, Naturalesa i Kalidat di Kuminda Eelco Ronteltap, e hefe di departamento Veterinario sra Claire Cointepas i diputado Clark Abraham.
Rekorido i klousura
Despues ku e seremonia a terminá, tur e presentenan a haña oportunidat pa tira un bista den e matadero renobá durante un rekorido inspirativo, kaminda a mustra e fasilidatnan i instalashonnan renobá i mehorá.