Pèrmit di establesimentu

Un pèrmit di establesimentu ta un eksigensia pa tur hende ku ke kuminsá un negoshi na Boneiru, ke ekspandé un negoshi òf ke trese kambio na un negoshi eksistente konforme e Lei Establesimentu di Empresa BES (Wet Vestiging Bedrijven BES) ku for di 10 di òktober 2010 ta na vigor na Boneiru (i tambe na Sint Eustatius i Saba). Pa hasi petishon pa un pèrmit di establesimentu por akudí na Direktorado di Planifikashon i Desaroyo, departamentu di Realisashon, unidat pèrmitnan ekonómiko. Por hasi petishon pa un pèrmit di establesimentu pa medio di e formulario di petishon pa pèrmit di establesimentu, ku e dokumentonan korespondiente nesesario.

E formulario di petishon mester ta kompletamente yená i firmá, i mester pone tur dokumentu aserka. No ta tuma petishonnan ku no ta kompletamente yená den tratamentu.

Establesimentu di un negoshi na Boneiru

Ku eksepshon di un Fundashon, mester hasi petishon pa pèrmit pa tur forma di empresariado na Boneiru. E formanan di empresariado ku mas tantu ta keda lantá ta negoshi propio (eenmanszaak), Sosiedat Anónimo (NV) i Sosiedat di Responsabilidat Limitá (BV).

E diferensia entre un negoshi propio i e sosiedatnan:

• Negoshi propio: den kaso di un negoshi propio no tin diferensia entre e propiedatnan empresarial i e propiedatnan personal. Komo doño di un negoshi propio un persona ta personalmente responsabel pa tur obligashon di e negoshi. Pa lanta un negoshi propio e persona mester ta establesé permanentemente na Boneiru i inskribí den registro sivil komo tal.
• Un sosiedat (anónimo òf di responsabilidat limitá) ta  un órgano di sosiedat ku akshonista,  manehá pa derecho di sosiedat i e statutonan ku ta optené na momentu di su lantamentu na notario.

!Anunsio importante!

Entrante 1 di yüli 2021 NO mester bai Registro Sivil mas pa e prueba di residensia.

E pago di $8.38 mester wordu hasi online i e resibu di pago mester wordu agrega huntu ku e aplikashon.

Registro Sivil ta agrega e prueba di residensia na bo aplikashon.

Prosedura pa hasi petishon

Despues di inskripshon na Kámara di Komèrsio por hasi petishon pa un pèrmit di establesimentu pa medio di yena e formulario di petishon kompletamente i entregá esaki huntu ku e dokumentunan nesesario na departamentu di Realisashon di Direktorado di Planifikashon i Desaroyo. Despues di a entregá e petishon e persona ku a hasi petishon ta risibí un konfirmashon ku e petishon a drenta na e departamentu. Dentro di 8 siman despues di a risibí e petishon lo trata e pèrmit i entregá esaki. Si dentro di 8 siman e pèrmit di establesimentu no a keda tratá, por asumí ku a otorgá esaki outomátikamente konforme lei.  

Otro pèrmit

Aparte di e pèrmit di establesimentu eventualmente otro pèrmit por ta nesesario pa eksplotashon di un empresa. Por ehèmpel pa eksplotashon di un empresa di Hóreka, banda di e pèrmit di establesimentu un pèrmit di bibida i hóreka tambe ta nesesario. Por hasi petishon pa esaki tambe na Direktorado di Planifikashon i Desaroyo, departamentu di Realisashon, despues ku a optené e pèrmit di establesimentu.

Pa pregunta i mas informashon por tuma kontakto ku:
Direktorado di Planifikashon i Desaroyo, departamentu di Realisashon 
Adrès: Kaya Amsterdam 23
Telefòn: +599 715 8130
I-meil: Solanshe.soliano@bonairegov.com