Siman pasá a pone dos paso importante pa ehekushon di e trabounan den sentro di siudat na Playa (centrumgebied). Ta trata aki di e proyekto Kaya Grandi i bisendario. Na promé lugá a firma e akuerdo ku e kontratista. Seguidamente riba djabièrnè 14 di ougùstùs un seshon di informashon a tuma lugá ku habitantenan i empresarionan ku ta establesé den área di e proyekto. Durante e enkuentro akí a splika kua ta e trabounan ku ta keda ehekutá, kon e planifikashon den liñanan grandi i e repartishon den fase ta i kiko esaki ta nifiká pa e bisindario. E siman akí e trabounan a kuminsá.
Segun espektativa e durashon total di ehekushon di e proyekto ta shete luna.
E trabounan ta enserá entre otro riba mehorashon di desagwe di awa di yobida i un strukturashon mehorá di e espasio públiko, kaminda e diferente funshonnan den sentro di siudat ta haña nan espasio ku ta nesesario. Di e manera akí ta surgi un strukturashon koherente i funshonal di nos sentro di siudat.
Den kòmbersashon ku habitantenan i empresarionan
Durante e seshon di informashon tabatin espasio pa habitantenan i empresarionan hasi pregunta i kompartí nan preokupashonnan i nan puntonan di atenshon. E aporte aki ta yuda pa sinkronisá e ehekushon mas bon posibel ku uso diario di e área.
E hefe suplente di direktorado di Planifikashon i Desaroyo, Ligwino Leito, ta pone énfasis riba importansia di e kolaborashon akí: “Ku firmamentu di e akuerdo nos ta pone un paso importante den direkshon di e ehekushon. Nos sa ku trabou den sentro di siudat tin impakto riba habitantenan, empresarionan i bishitantenan. Pa e motibu akí nos ta haña ku ta importante pa duna informashon na un manera klarito, skucha bon kiko ta biba serka e hendenan alrededor, i keda den kontakto ku e bisindario durante e ehekushon. Di e manera akí nos ta traha huntu pa logra un sentro di siudat ku ta mas atraktivo, mas aksesibel i mihó strukturá pa futuro.”
Alkansabilidat durante e trabounan
Durante e ehekushon tur edifisio ta keda alkansabel na pia. Pa e peatonnan nos ta krea ruta di kana seif i bon kla demarká. Tambe e área di proyekto ta keda alkansabel pa servisionan ousiliar den kaso di emergensia.
Kaminda seramentu di kaya òf desviashon temporaral ta nesesario, nos ta komuniká adelantá tokante esaki. Durante e ehekushon, Entidat Públiko Boneiru ta keda duna informashon tokante e progreso, e diferente fasenan i eventual kambionan den alkansabilidat.
Ku inisio di e trabounan nos ta pone un siguiente paso konkreto den mehorashon mas aleu di e espasio públiko den sentro di siudat na Playa.
