Un miembro di Tweede Kamer a pensa i introdusí e proposishon di lei akí. Gezaghèber di Boneiru i Entidat Públiko Boneiru no tabatin enbolbimentu ku desaroyo di esaki. E proposishon di lei no ta un lei ainda. Na e momentu akí pues, nada no ta kambia pa Boneiru. Den kaso ku finalmente nan aprobá e lei, e ora ei na un manera kuidadoso lo evaluá kon ta bai apliká e outoridat proponé na Boneiru, ku atenshon permanente pa siguridat di nos habitantenan i pa libertat di ekspreshon di opinion.
Kiko e parlamentario a proponé?
E proposishon di lei ta duna ‘burgemeester’-nan un outoridat komplementario pa den situashonnan eksepshonal aktua kontra disturbio grave di òrden públiko ku a keda instigá via internèt òf medionan sosial, manera yamada públiko pa rebelion, violensia òf destrukshon. Ta trata akí di situashonnan eksepshonal ku ta forma un menasa serio pa òrden públiko i siguridat, i no di ekspreshonnan komun di opinion òf diskushonnan sosial. Den e memoria di splikashon tin notá ku e outoridat akí lo ta vigente pa e gezaghèbernan di Boneiru, Saba i Sint Eustatius tambe.
Gezaghèber John Soliano:
"Libertat di ekspreshon di opinion ta un derecho fundamental. Den kaso ku e proposishon di lei akí keda aprobá, e ora ei na un manera kuidadoso nos lo evaluá na ki manera nos ta bai apliká e outoridat proponé. Den esaki semper nos ta tene kuenta ku nos konteksto lokal i nos ta vigilá e ekilibrio entre siguridat i libertat di ekspreshon di opinion.”
Kontinuashon
Despues di e tratamentu den Tweede Kamer ta sigui Eerste Kamer. Ta te despues di aprobashon di parti di Tweede i Eerste Kamer, e lei por drenta na vigor. Entidat Púbiko Boneiru ta sigui vigilá e desaroyonan i ta informá nos habitantenan asina ku tin mas klaridat tokante desaroyo mas aleu di e proposishon di lei.
