Entidat Públiko Boneiru (EPB) a kuminsá e siman akí ofisialmente ku un entrenamentu Train de Trainers – Empoderamentu di Hende Muhé. E entrenamentu ta pa profeshonalnan ku ta traha ku gruponan vulnerabel, bou di kua hende muhé hóben. E entrenamentu ta konsistí di 5 dia di entrenamentu, siguí pa un entrenamentu on-the-job na tres di e organisashonnan ku ta partisipá.
For di ougùstùs aña pasá, EPB via Direktorado Komunidat i Kuido huntu ku Stichting Lezen en Schrijven di Hulanda ta traha na empoderamentu di profeshonalnan. Aña pasá mas ku trinta profeshonal a sigui entrenamentu tokante empoderamentu, paternidat, finansa i trabou.
Ku e entrenamentu akí, profeshonalnan ta haña konosementu, abilidat i instrumentonan práktiko pa guia hende mihó na mas outonomia i independensia ekonómiko. E entrenamentu ta dirigí su mes spesialmente riba hende muhé hóben for di 16 aña, bou di kua mamanan soltero ku por ehèmpel ta enfrentá desempleo, debe, violensia doméstiko i oportunidatnan limitá riba tereno di enseñansa i desaroyo.
Por apliká e konosementu for di e entrenamentu direktamente den práktika diario i por kompartí esaki ku kolega i otro profeshonal. Ademas ta organisá entrenamentu na trabou den tres organisashon partisipante. Durante e entrenamentu on-the-job akí, e profeshonalnan ta pone loke nan a siña den práktika i nan mes ta duna entrenamentu na e grupo di enfoke.
Durante e seremonia di inisio, diputado Silberie a enfatisá importansia di e ròl di profeshonalnan: “Boso por hasi e diferensia mirando no solamente loke un hende no por, sino hustamente loke un hende sí por i kua ta e posibilidatnan ku tin ainda.”
EPB ta gradisí Stichting Lezen en Schrijven i tur organisashon i profeshonal ku a partisipá pa nan esfuerso i kolaborashon.
