Riba 22 di yüni diputado Timoteo Silberie a lansa ofishalmente e Trahadó di Presupuesto (Budgetplanner). Trahadó di Presupuesto ta un material di lès ku diferente organisashon sosial na Boneiru lo bai traha kuné. E ta yuda habitantenan pa haña mas konosementu di nan asuntunan finansiero i atendé mihó ku nan entrada i gastunan.
Durante e lansamentu ofishal di e Trahadó di Presupuesto, diputado Silberie a enfatisá importansia di konsiensia finansiero i prevenshon: “Independensia finansiero ta kuminsá ku konosementu. Dor di duna habitantenan e instrumentonan korekto, nos por sigui konstruí huntu ku nos partnernan na un Boneiru kaminda ménos hende ta haña nan mes den un situashon di debe problemátiko i kaminda mas habitante tin kontrol riba nan futuro finansiero.”
Den kuadro di e aserkamentu di problemanan finansiero, Direktorado Komunidat i Kuido di Entidat Públiko Boneiru a organisá un programa di ‘train-de-trainer’ (entrená e entrenadó) na òktober 2025. Esaki a tuma lugá huntu ku Nationaal Instituut voor Budgetvoorlichting (Nibud). Na e treinen akí a partisipá representantenan di shete organisashon sosial.
Nibud ta un instituto di konosementu i informashon independiente riba tereno di finansa doméstiko i ta hasi esfuerso pa logra un Hulanda sin problema finansiero. Durante e treinen akí a pone e fundeshi pa desaroyá e Trahadó di Presupuesto. E material di lès práktiko akí ta sostené profeshonalnan ku ta guia habitantenan ora tin problemanan finansiero.
Desaroyo di e Trahadó di Presuesto ta konektá ku e Plan di programa “Traha pa logra Prosperidat i Bienestar di Boneiru” (“Werken naar Welvaart en Welzijn van Bonaire”). A base di e programa akí a forma diferente tim di trabou, entre otro e tim di trabou Debe.
E tim akí ta konsistí di representantenan di Entidat Públiko Boneiru, sekshon Trabou Sosial Finansa di Sentro Akseso, ministerio di Asuntunan Sosial i Empleo (SZW) i NVVK (e organisashon di sektor pa ayudo di debe i asistensia finansiero). Den e tim di trabou ta trahando pa sigui desaroyá mas e trayekto legislativo, ayudo ku saniamentu di debe, sosten preventivo i maneho di presupuesto. Ademas ta hasi esfuerso pa logra un kooperashon fuerte entre e partnernan di kadena.
Den e kuadro ei resientemente a organisá entre otro un seshon di trabou na Hulanda. Durante e enkuentro akí e partnernan a sera konosí ku e partnernan embolbí di Hulanda Oropeo. Tambe a diskutí posibilidatnan di kooperashon ku diferente munisipio na Hulanda manera Tilburg, Utrecht i Amsterdam.
Entidat Públiko Boneiru, den kolaborashon ku Sentro Akseso i otro partnernan, ta keda hasi esfuerso pa sigui desaroyá ayudo pa saniamentu di debe preventivo i kurativo. Pa medio di strategia-, aktividat- i akuerdonan di kooperashon nobo ta trahando pa fortifiká independensia finansiero i bienestar di habitantenan di Boneiru.
