E promé edishon di ‘SAMEN FIT’ tabata éksito rotundo

E siguiente edishon ta tuma lugá 19 di febrüari 2022.

SAMEN FIT ta parti di e proyekto pa hisa aksesibilidat i partisipashon di hendenan ku defisiensia na espasionan públiko di Boneiru. Den e kuadro di e tratado di Nashonnan Uni pa personanan ku defisiensia, Direktorado di Komunidat i Kuido ta ehekutando for di aña pasa diferente proyektonan. Ku e proyekto SAMEN FIT Direktorado di Komunidat i Kuido ta bai inisiá aktividatnan di moveshon riba un base struktural den barionan pa asina promové moveshon serka hendenan ku defisiensia i hende nan ku edat avansá.

Indebon, e departamento di deporte di Direktorado di Komunidat i Kuido ta organisá e aktividatnan na sentronan di bario.

E promé edishon a tuma lugá djasabra último 12 di febrüari 2022 na Sentro di Bario Tera Kora, Sentro di Bario Amboina i Plasa Chiku Goeloe.
E siguiente edishon ta tuma lugá 19 di febrüari 2022, e biaha aki na Parke Lan Lan Clarinda na Nikiboko, Sentro Orkidia (Noord Saliña) i Cocari na Rincon di 9’or te ku 11’or. Bo tin un defisiensia/hèndikèp òf bo tin edat di 55+? Bo ta bonbiní na un di nos sitionan di aktividat.

Bo presensia ta keda altamente apresiá. Si ta nesesario por regla transporte. Pa mas informashon tokante e aktividatnan por tuma kontakto ku Direktorado Komunidat i Kuido ku señora Sharifa Sedney na telefòn 715-5311 òf 785-4374 òf por manda un mail na moveshondenbario@bonairegov.com.