Durante un konferensia di prensa ku a tuma lugá 28 di ougùstùs 2025 a duna splikashon tokante Selebrashon di Dia di Boneiru 2025. Presidente di Komishon di Dia di Boneiru Jean-Anne Winklaar, miembro di Komishon di Komunidat den Akshon Roosje van der Hoek, Diputado Clark Abraham, Diputado Weber i Hefe di SKAL Timoteo Silberie tabata presente durante e konferensia.
Na kaminda pa Dia di Boneiru
Dia di Boneiru ta sumamente importante. Pa engrandesé e selebrashon akí, Komishon di Dia di Boneiru a organisá un siman yen di aktividat signifikativo ku ta mustra Boneiru su diversidat i rikesa. Tur dia nos ta pone un paso den nos biahe konhunto. Entidat Públiko Boneiru ta invitá henter nos komunidat, grandi i chikí, pa huntu nos eksperensiá i selebrá e dianan festivo aki.
• Djaluna 1 di sèptèmber – Sunset Jam Session na SKAL
Un anochi musikal pa huntu gosa di talento, hopi ritmo i energia di nos isla ku bahada di solo.
• Djamars 2 di sèptèmber – Sip & Paint
Kreatividat i enkuentro ta bini huntu durante un anochi ameno yen di arte i inspirashon.
• Djárason 3 di sèptèmber – Nochi di pelíkula “Nos Boneiru”
Un bista íntimo riba nos pasado i presente atraves di lèns di pelíkula. Un anochi pa siña i reflehá huntu.
• Djaweps 4 di sèptèmber – Un anochi bou di sombra di luna kla
Un anochi yen di poesia bou di luna yen. Poetanan i artistanan di “Spoken word” ta duna bos na storianan i sintimentunan ku ta konektá nos isla i nos komunidat.
• Djabièrnè 5 di sèptèmber – Komunidat den Akshon
Un dia di boluntario kaminda huntu nos ta lora nos manga di kamisa. Pa medio di traha huntu pa nos isla, nos ta mustra ku nos forsa ta den union i kompromiso pa Boneiru. Tambe, parti anochi lo tin e ‘Ban topa Dia di Boneiru’ kaminda lo tin diferente diskurso i presentashon te den oranan lat di anochi.
Bini huntu pa asina nos por habri Dia di Boneiru ku un tremendo show di vürwèrk.
• Djasabra 6 di sèptèmber – Dia di Boneiru
Riba djasabra 6 di sèptèmber, Dia di Boneiru mes, nos lo kuminsá ku e seremonia ofisial for di 9 or di mainta. Despues ta sigui un dia yen di baile, músika, kuminda i enkuentro, kaminda nos komo pueblo ta bini huntu i selebrá nos identidat.
Dia di Boneiru no ta solamente un dia di fiesta. E ta un momentu di reflekshon, konekshon i orguyo. E ta un dia kaminda nos ta brasa otro, kompartí nos balornan i wak huntu den direkshon di futuro.
E aña akí nos selebrashon ta den signo di e tema inspirativo: “Nos ta Boneiru”.
E tema akí ta bai mas leu ku solamente palabra. E ta un yamada pa para ketu na ken nos ta komo pueblo, kiko ta konektá nos i kiko ta hasi nos spesial. E ta rekordá nos ku huntu nos ta forma nos isla su forsa den nos kultura, nos tradishonnan, nos naturalesa i mas ku tur kos den nos hendenan.
Paso pa paso nos ta kana yega Dia di Boneiru.
Un dia riba kua huntu nos ta bisa:
Nos ta Boneiru.
