Entidat Públiko Boneiru (EPB) i Ministerio di Asuntunan Interno i Relashon di Reino (BZK) riba 19 di yüni último a firma un anekso huntu ku e akuerdo di atministrashon pa atendé ku Selibon Lagun. Ku e anekso akí EPB i BZK ta konfirmá nan esfuerso konhunto pa ehekutá e palabrashonnan atministrativo ku a hasi riba 20 di novèmber 2025, sostené pa Ministerio di Infrastruktura i Maneho di Awa (IenW) i Ministerio di Agrikultura, Peska, Siguridat di alimento i Naturalesa (LVVN).
Den e akuerdo gubernamental ta kontené palabrashonnan mas konkreto tokante ehekushon di e rekomendashonnan di e investigashon tokante Selibon, ehekutá pa KPMG i tokante finansiamentu di maneho di desperdisio na Boneiru pa periodo 2026-2028. For di investigashon akí ta resultá ku medida- i invershonnan komplementario ta nesesario pa yega na un sistema di maneho di desperdisio duradero, sigur i prepará pa futuro. E enkargo finansiero total ta suma alrededor di USD 40,1 mion, ku ta konsistí di gastunan di operativo i invershonnan den ekipo i infrastruktura.
E periodo ku a transkurí ya a tuma pasonan importante. Por ehèmpel a tuma medidanan pa garantisá kontinuidat operashonal di Selibon, ta invertí den ekipo nobo i EPB ta traha huntu ku BZK riba solushonnan struktural pa prosesamentu di desperdisio na Boneiru. Esaki a resultá den entre otro terminashon di e supervishon intergubernamental. Kolegio ehekutivo a komprometé su mes pa ehekutá e rekomendashonnan di e rapòrt di KPMG. Pa 2026 EPB lo pone un suma adishonal di USD 4,4 mion disponibel pa medio di e di dos kambio di presupuesto di e aña akí. Ademas ta invertí pa e periodo 2026-2028 en total USD 5,1 mion den ekipo, infrastruktura i fortifikashon kontinuo di maneho operashonal di Selibon.
Kolegio ehekutivo a duna enkargo pa hasi un investigashon independiente tokante faktibilidat finansiero, komo tambe sitionan alternativo pa kolekshon i prosesamentu di desperdisio. E investigashon akí ta den ehekushon na e momentunan akí. Ta spera e resultadonan medio ougùstùs i nan lo hunga un papel importante den siguiente desishonnan tokante maneho di desperdisio na Boneiru.
Ku e anekso EPB i BZK konhuntamente ta duna mas kontenido na e palabrashonnan atministrativo ku a hasi na final di 2025. Ku esaki ta dal un paso importante den direkshon di un maneho operashonal duradero, mihó protekshon di hende i medioambiente i un kadena di desperdisio pa Boneiru ku ta prepará pa futuro.
