Direktorado di Planifikashon i Desaroyo di Entidat Públiko Boneiru a tene un seshon di informashon pa arkitektonan i kompanianan di konstrukshon ku regularmente ta entregá petishon pa pèrmit di konstrukshon. Durante e enkuentro e presentenan a haña splikashon tokante e sistema digital nobo ku ta drenta na vigor dia 5 di òktober.
Durante e seshon a splika paso pa paso kon aworó mester entregá un petishon pa pèrmit di konstrukshon digitalmente. E partisipantenan a haña un demonstrashon di e proseso di petishon. Tambe a splika kua ta e informashon i e dokumentunan ku ta nesesario pa entregá e petishon den un forma kompleto.
Durante e enkuentro tabatin espasio pa pregunta i fitbèk. E arkitektonan i e kompanianan di konstrukshon ku tabata presente regularmente ta entregá petishon pa pèrmit di konstrukshon na nòmber di nan klientenan. A base di nan eksperensia nan por a kompartí vários punto di atenshon i hasi pregunta tokante e sistema nobo di traha.
Direktorado di Planifikashon i Desaroyo a skohe pa organisá un seshon ku e grupo akí promé. Esaki pasobra e sistema di traha digital nobo tin influensia direkto riba e manera ku nan ta prepará i entregá petishon pa pèrmit di konstrukshon. Di e manera akí nan por prepará na tempu pa e kambio.
For di 5 di òktober 2026 mester entregá petishon pa pèrmit digitalmente via wèpsait di Entidat Públiko Boneiru. Esaki ta konta pa tur hende ku ke hasi petishon pa un pèrmit di konstrukshon, tantu hende partikulir komo kompania.
Pa duna hende partikulir tambe ku ta hasi petishon un bon preparashon, direktorado di Planifikashon i Desaroyo den e periodo binidero via diferente kanal lo duna splikashon tokante e sistema di traha digital nobo. Den esaki por hasi uso entre otro di video di instrukshon. Mas informashon tokante esaki ta sigui despues.
