Monkeypox

‘Monkeypox’ ta un infekshon di vírùs ku originalmente tabata haña prinsipalmente na Afrika. For di prinsipio di 2022, e malesa ta plama rònt mundu.

Síntoma

E síntomanan mas importante ta kentura, doló di kabes i múskulo, kansansio i mancha kòrá riba kueru ku ta bira blas chikitu. E blasnan akí por hasi doló. Blasnan por ta riba kueru, pero tambe na lugánan ménos visibel manera den boka. Despues ku e blasnan seka, ta forma kaska ku ta kai despues di 2-3 siman. Por keda sikatris e ora ei.

Kon ta transmití e malesa?

Tur hende por kontagiá i ta topa e vírùs den tur grupo di edat. E vírùs ta pasa di un persona pa otro for di e vògt den blas, pero skupi i e kaskanan tambe por ta kontagioso. Plamamentu di e vírùs por sosodé tambe via material kontagiá manera laken. Bo por ta kontagiá kaba promé ku tin síntoma visibel.

E chèns mas grandi pa kontagio ta via kontakto íntimo manera sunchi, brasa i sèks ku un hende ku ta kontagiá. Via sleimflis òf herida chikitu, e vírùs por drenta otro persona.

Kiko hasi ora tin keho?

Pa evitá ku e vírùs ta sigui plama, ta importante pa konsultá dòkter di kas ora tin keho. Si ta nesesario, e dòkter por kohe material ku un q-tip pa hasi tèst na laboratorio. Mayoria biaha no mester di tratamentu i e kehonan ta bai di nan mes. Pa evitá ku e vírùs ta plama ta importante si pa keda kas i no mishi ku otro te ora e kehonan pasa.

Si konstatá ku tin ‘monkeypox’ ta importante pa informá hendenan tambe ku kende tabatin kontakto estrecho asina nan tambe por ta alerta pa keho.

Bakunashon?

Aktualmente mundialmente ta plania kampañanan di bakunashon. Tambe na Boneiru ta mira kua grupo por bini na remarke pa bakunashon. Aunke tur hende irespekto nan sekso, nashonalidat òf edat por pega ku e vírùs, den informashonnan internashonal nos ta mira ku mayoria kaso na e momentu akí ta keda raportá serka hende hòmber ku ta hasi sèks ku hende hòmber (homber intimo ku homber).

Por lo demas

Ta yama ‘monkeypox’ na Hulanda tambe ‘apenpokken’. Na Boneiru tambe ta usa ‘apenpokken’ komo nòmber pa infekshon di kueru prinsipalmente serka mucha. Bakteria ku ta haña hopi riba kuero i no e vírùs di bruera / ‘pokkenvirus’ ta kousa e infekshonnan di kueru akí serka mucha, ku tambe ta yama ‘infekshon di kueru di barba’ / ‘krentenbaard’. E Organisashon Mundial di Salú (WHO) ta pidi paisnan pa prepará nan mes pa identifiká tur kaso di ‘monkeypox’. Tambe e Organisashon Mundial di Salú (WHO) ta pidi pa tuma e medidanan nesesario pa prevení infekshon ku ta pasa di hende pa hende i atenshon spesial pa evitá stigmatisashon i diskriminashon di individuonan òf gruponan.

Por haña mas informashon tokante monkeypox riba e wèpsait di RIVM.

Pa pregunta por tuma kontakto ku e departamentu di Salubridat Públiko telefòn 715 5324 òf meil e sekshon di kombatimentu di infekshon izb@bonairegov.com.