Gezaghèber

Ròl di gezaghèber

Gezaghèber ta independiente i no ta ligá na ningun partido polítiko. Ta nombr’é via Dekreto Real, no ta siudadano a skoh’é. 

Gezaghèber tin un tarea importante den gobernashon di Boneiru. Su trabou ta parse esun di alkalde na Hulanda Oropeo pero e tin mas tarea. E ta representá Entidat Públiko Boneiru.  

Gezaghèber ta presidente di Konseho Insular. E ta dirigí reunion i ta sòru pa hiba debate bon i pa tumamentu  di desishon bai bon. E no tin derechi di voto den Konseho Insular. Gezaghèber ta presidente i miembro tambe di Kolegio Ehekutivo. Komo presidente e ta dirigí reunion i ta duna un aporte tokante kontenido tambe di tumamentu di desishon. Kolegio Ehekutivo ta tuma desishon konhuntamente.  

Gezaghèber tin otro tarea tambe ku ta reglá den lei. E ta supervisá órden públiko i seguridat. Den situashon di krísis e ta na mando. E ta mantené kontakto ku Representante di Reino i ku ministerio na Hulanda.  

Gezaghèber interino
Gezaghèber interino ta remplasá gezaghèber temporalmente. Esaki ta sosodé ora gezaghèber no tei temporalmente, por ehèmpel pa motibu di ferlòf, malesa, òf pasobra e término ku e tabata den funshon a pasa i ainda no a nombra un gezaghèber nobo.  

Gezaghèber interino tin e mes tareanan i outorisashon ku gezaghèber. Durante ku e ta remplasá gezaghèber, gezaghèber interino ta tuma tur desishon ku ta nesesario pa gobernashon diario. Asina nada no ta kambia pa habitante i organisashon den e forma ku gobièrnu ta traha. 

Representante di Reino ta nombra gezaghèber interino. Esaki ta sosodé pa un periodo definí.