Text Size

  • Increase
  • Decrease
  • Normal

Current Size: 100%

Spich di gezaghebber Edison Rijna riba 30 di sèptèmber -

Kralendijk - Apresiabel kosiudadan,

Ayera mi a informá boso via di un ‘statement’ grabá adelantá tokante e medidanan nobo ku ta na vigor entrante awe. Komo ku mi mester tabata presente na un reunion di Konseho Insular, no tabatin oportunidat pa prensa hasi pregunta. Awe, na final di e enkuentro aki, tin sufisiente espasio pa esaki.

Ayera ya kaba mi a indiká ku a base di análisis a fondo, nos a yega na e medidanan nobo aki. Nos a wak e kantidat di infekshon, e klùsternan i lugánan kaminda infekshon ta tuma lugá. A base di esei nos por a pone medidanan mas dirigí drenta na vigor. Esaki ta nifiká ku pa algun sitio tin medida ménos estrikto ta konta. Pa motibu di e hopi infekshonnan ku a tuma lugá den esfera di trabou, ta hopi importante sí pa personanan traha na kas mas tantu posibel.

Mi a nota ku tin hende no ta haña e medidanan aki sufisientemente estrikto, por ehèmpel pasobra nan ta preokupá ku e salú di nan yu i mayornan. Tambe tin hende ku, por ehèmpel pa miedu pa ku nan entrada, ke un suavisashon di e medidanan. Mi tin komprenshon pa ámbos banda. Laga nos keda den kombersashon ku otro i huntu buska solushonnan. Mi lo keda mantené boso na altura di e desaroyo i medidanan mas tantu posibel.

Un djis dòkter Marian Luinstra-Passchier lo presentá e análisis ku a uza pa yega na e eskohonan. E lo duna un análisis di e sifranan di e periodo tras di lomba. Mas aleu e lo elaborá tokante e kantidat di infekshon nobo, e klùsternan i e sitionan kaminda infekshon ta tuma lugá.

Por último: mi ke hasi un yamada na boso pa mantené boso mes na e medidanan, pasobra ta responsabilidat di nos tur pa ta: corona smart!