Text Size

  • Increase
  • Decrease
  • Normal

Current Size: 100%

Ku satisfakshon diputadonan ta wak bèk riba un bishita di trabou ku hopi kontenido

Den Haag – Diputadonan Elvis Tjin Asjoe, Nina den Heyer i James Kroon awe (djasabra) ta klousurá nan bishita di trabou na Hulanda Oropeo ku nan último sitanan. Mañan nan ta biaha bèk pa Boneiru. E diputadonan a kompletá un programa ku tabata hopi yen. Mesora despues di nan yegada na Schiphol e promé enkuentro a tuma lugá. ‘Nos no a fèrfelá nos mes’, Elvis a bisa ku un kinipí di wowo. ‘Nos a bai ku un agènda hopi yená, pero durante siman a bini mas sita aserka ku hendenan ku tin gana di nifiká algu pa Boneiru.’ Durante hopi enkuentro e tres diputadonan a aktua komo tim, manera esun ku e Komishon di ‘Tweede Kamer’ pa Relashonnan den Reino i ‘Raad van State’. Banda di esei kaminda ta trata nan mes portofolio nan a hiba tambe hopi kombersashon bilateral.     

 

Kombatimentu di pobresa i akohida di mucha

‘Serka mi e aksento tabata riba kombatimentu di pobresa’, segun Nina den Heyer. ‘Tokante esei mi a papia ámpliamente ku sekretario di estado Tamara van Ark di Asuntunan Sosial. ‘Den e kombersashon ei mi a pleita tambe pa hasi akohida di mucha aksesibel grátis pa mucha di 0 te ku 4 aña. Esei lo duna un aporte enorme na kombatimentu di pobresa serka famianan ku ún mayor so. Pa por gana un entrada un tiki rasonabel hopi hende tin dos trabou, pero si komo mayor bo ta pará bo so sin pareha, bo tin ku kuida bo yunan tambe. Ku akohida di mucha grátis den un solo tiru bo ta alkansá diferente meta: e ta bon pa e mayornan enbolbí, pa e muchanan i pa nos ekonomia’, segun Den Heyer ku banda di tur e reunionnan formal a papia tambe ku studiantenan boneriano tokante nan eksperiensianan.  

 

Plan integral di kaminda 

‘Ami a pidi prinsipalmente atenshon pa e nesesidat ku nos tin ku kuminsá atendé rápidamente ku nos kareteranan. E estado malu di nos kamindanan no solamente ta inkonfortabel, pero nan ta sòru pa situashonnan peligroso tambe. Ademas e ta hasi un impreshon malu riba turistanan i potensial invershonistanan ku ta bishitá Boneiru. Entre otro den e kombersashon ku minister Cora van Nieuwenhuizen di Infrastruktura i Maneho di Awa i despues ku su ámtenarnan, mi a splika ku nos ta trahando riba un plan integral di kaminda. No ta bai solamente pa drecha e kamindanan, pero mi ta haña ku nos mester wak tambe kon nos por mehorá situashonnan di tráfiko eksistente, di manera ku ta promové fluo i siguridat di tráfiko i ta evitá molèster di stashonamentu di outo. Na mes momentu nos ta traha un plan di mantenshon struktural di manera ku den futuro nos no ta haña nos ku e mésun problemanan’, segun Kroon, kende a bini ku e proposishon pa e diputadonan hasi akto di presensia na selebrashon di Dia di Rincon na Tilburg.     

 

Promesanan firme

Elvis Tjin Asjoe ta wak sumamente satisfecho bèk riba e bishita di trabou. Pa mi e punto kulminante tabata e akuerdo ku e ministerionan di Infrastruktura i Maneho di Awa i Asuntunan Interior i Relashonnan den Reino. Pa motibu di e kontribushonnan finansiero ku nan a primintí, tin bista riba un bon final di un konflikto di hopi aña tokante terminashon di e instalashon di purifikashon di awa shushi. Esei ta bon notisia pa nos suidadanonan, nos refnan i e kunukeronan i hotèlnan ku ke hasi uso di awa purifiká. Mi ta kontentu tambe ku firma di minister Van Nieuwenhuizen bou di e promesa di lo ke sigui supsidiá tarifa di awa di bebe te na aña 2025 ku 1 mion euro anualmente. Ora ku nos Kolegio Ehekutivo nobo a tuma asiento mi no por a pensa ku asina rápido nos por a alkansá e tipo di resultadonan konkreto aki na Den Haag.’ Un di dos punto kulminante pa Tjin Asjoe tabata e invitashon di organisashon di Global Entrepeneurship Summit 2019 pa bin konta invershonistanan prosedente di tur parti di mundu tokante e konsepto di di Blue Destination di Boneiru.   

 

Ban traha awor

‘Nos ta wak bèk riba un siman ku a kana bon. Nos a papia ku masha hopi hende mes. Ámtenarnan di e ministerionan, miembronan di Eerste i Tweede Kamer, i masha hopi otro ‘stakeholder’. E deseo pa traha huntu ta grandi, pero naturalmente solamente si nos ta dispuesto pa tuma nos propio responsabilidat tambe. Nos a hasi bon kla ku Kolegio Ehekutivo ke hasi esaki i ta hasi esaki tambe. P’esei ora nos ta bèk na Boneiru nos ta bai traha tur ku tin riba terminashon di nos Programa di Gobernashon, pa kua, despues di nos yamada, nos a haña masha hopi ‘input’ útil di nos suidadanonan i organisashonnan. Durante di nos bishita na Den Haag nos a haña hopi inspirashon. Awor ta kestion di traha plan di ehekushon i konhuntamente pone nos skòuder bou di esakinan’, segun Tjin Asjoe.

Foto Nico van der Ven