Text Size

  • Increase
  • Decrease
  • Normal

Current Size: 100%

KOLEGIO EHEKUTIVO: STINAPA TA DETERMINA SU PROPIO MANEHO

Kralendijk- Kolegio Ehekutivo no ta tuma un posishon pa loke ta trata terminashon di e relashon di trabou entre STINAPA i su direktor saliente, Arjen de Wolff. Segun diputado Elvis Tjin Asjoe di ku entre otro ekonomia i turismo den su portafolio, STINAPA ta outónomo ora ta traha asuntunan manera esaki.

“STINAPA ta loke nos ta yama un organisashon no-gubermental (NGO)”, Tjin Asjoe ta splika. Segun e diputado esaki ta nifiká ku STINAPA ta hiba su propio maneho, i ta responsabel tambe pa su propio maneho di personal. E diputado ta di opinion sin embargo, ku te na e momentunan aki no tin motibu pa duda e konsiderashonnan di direktiva di STINAPA, pa loke ta trata e desishon aki.  Banda di esaki kolegio ehekutivo ta komprondé ku esaki ta un desishon ku aprobashon di ámbos partido.

Tjin Asjoe a bisa ku entretantu sí tabata tin un promé kontakto ku STINAPA riba e asuntu. “STINAPA ta un organisashon importante den nos komunidat ku un tarea hopi importante, ku ta protekshon di nos medio ambiente. Alabes nan ta un sosio importante di gobièrnu ora ta trata nos esfuersonan pa posishoná Boneiru komo e promé ‘Blue Destination’ na mundu. Den e kuadro aki nos a pidi e direktiva di STINAPA pa dentro di poko reuní ku BC, pa duna splikashon tokante e manera ku kontinuidat i e funshonamentu di e organisashon ta wòrdu garantisá den lus di e situashon ku a surgi”.