Senior Konsehero Hurídiko Atministrativo
Entidat Públiko Boneiru ke trese kambio. Nos no por hasi esaki nos so. Nos ta buskando hendenan entusiasmá ku huntu ku nos ke traha riba un ambiente di trabou ku ta resiliente pa futuro. Nos ta para dilanti di retonan nobo i pa esaki nos tin mester di abo, senior konsehero hurídiko atministrativo! Huntu nos por sigui edifiká un sekshon hurídiko atministrativo mas robusto dentro di Entidat Públiko Boneiru.
Kiko bo ta bai hasi?
Departamento di Asuntunan Hurídiko i General (JAZ) ta enkargá ku asesoramentu di Konseho Insular, Kolegio Ehekutivo i e aparato públiko pa loke ta trata tur problemátika hurídiko i/òf atministrativo. Ku esaki e departamento ta e punto sentral den e ret i ta sòru pa tur hende aktua konforme legislashon i regulashon dentro di Entidat Públiko Boneiru. Pa e motibu akí e departamento ta enbolbí ku un variedat grandi di problemátika i/òf tópiko. P’esei e dinamismo dentro di e departamento ta hopi grandi.
Komo konsehero hurídiko atministrativo bo ta na altura di tur detaye di e profeshon. Dentro di e konteksto desafiante akí komo hurista bo ta responsabel pa asesoramentu i sosten hurídiko di e organisashon públiko. Banda di esaki bo ta responsabel pa duna i vigilá kalidat hurídiko na momentu di desaroyo i realisashon di tópikonan dentro di Entidat Públiko Boneiru ku ta surpasá maneho di e direktorado i/òf e departamento. Bo ta partisipá alabes den gruponan insular di trabou i proyekto òf bo ta duna direkshon na esakinan.
Loke nos ta ofresé bo
Na Entidat Públiko Boneiru nos ta haña apresio importante. Bo ta ripará esaki na bo sitio di trabou, pero tambe den e rekompensa ku bo ta haña pa bo trabou. Si bo no ta kumpli ku tur e eksigensianan ku tin pa e funshon akí, nos ta hasi uso di un eskala inisial. Esaki ta eskala 11 i ta resultá den un mínimo di $4.390 i un máksimo di $5.240 pa luna. E salario regular pa e funshon akí ta kai den eskala 12 ku un salario mínimo di $5.070 i un salario máksimo di $5.920 pa luna. Banda di esei bo por konta ku:
- Sèn di vakansi di 8,33%;
- Un ‘13ᵉ maand’ kompleto;
- Un siman di trabou fultaim di 36 ora;
- Un kòntrakt pa durashon di 3 aña. Bo ta sinti bo mes bon serka nos i nos tambe ta satisfecho ku bo dedikashon? E ora ei gustosamente nos ta ofresé un nombrashon vast pa tempu indefiní.
Bo salario definitivo ta a base di bo formashon, abilidat i eksperensia. Banda di esei nos tin algun otro kondishon laboral sekundario atraktivo, tokante kua gustosamente nos ta konta bo mas durante bo prosedura di solisitut!
Kiko ta e eksigensianan
Bo tin ‘feeling’ pa e relashonnan polítiko gubernamental den un organisashon públiko, manera Entidat Públiko Boneiru, i pafó di esaki. Bo sa kon pa keda riba pia dentro di e diferente nivelnan di e organisashon i huntu ku e koleganan enbolbí realisá konseho i legislashon. Banda di esaki bo ta kumpli ku loke tin menshoná akí bou:- Formashon akadémiko den Lei ku aksento riba derecho atministrativo i/òf derecho sivil.
- Bo a akumulá por lo ménos 5 aña di eksperensia den un funshon similar den un organisashon polítiko/gubernamental.
- Eksperensia den tratamentu di failnan kompleho i polítikamente sensibel i tambe bo ta ábil den dunamentu i formulashon di konseho.
- Interes i disponibilidat pa optené konosementu di regulashon di BES i di e regulashon lokal na Boneiru.
- Eksperensia ku kasonan dilanti wes den derecho atministrativo i/òf derecho sivil.
- Bon dominio verbal i por eskrito di hulandes.
- Nos ta preferá si bo ta dominá papiamentu tambe verbalmente i por eskrito òf ku bo ta dispuesto pa siña esaki dentro di un aña.
- Banda di esaki bo enfoke ta riba kliente i resultado, bo ta mustra inisiativa i bo ta íntegro. Bo por traha independientemente i tambe den tim.
Loke ta importante tambe pa sa
Dentro di e prosedura di solisitut nos ta hasi un assessment ku bo. Pa por traha pa Entidat Públiko Boneiru bo mester por entregá un Deklarashon Tokante Kondukta (VOG). Nos ta sera e vakatura akí dia 26 di febrüari 2025. Sòru pues pa bo reakshoná promé ku e fecha ei.
Sí! Mi ke e trabou akí
Nos ta anhelá pa risibí bo solisitut. Manda bo CV huntu ku bo motivashon promé ku 26 di febrüari 2025 na solliciteren@bonairegov.com Por dirigí esaki na e Hefe di departamento di Asuntunan Hurídiko i General, na atenshon di Departamento di Personal i Organisashon. Nos adrès ta Kaya Aruba 1, Kralendijk, Boneiru. Preferibelmente nos ta risibí bo karta di solisitut i bo CV via email: solliciteren@bonairegov.com.
Bo tin duda ainda òf bo ke haña mas informashon tokante e funshon? Tuma kontakto libremente ku e hefe di departamento mr. M. Valdink via telefòn 715 5330 ekstenshon 5332. Pa mas informashon tokante Entidat Públiko Boneiru bo por bishitá www.bonairegov.com.
