Orkan
Promé ku mal tempu presentá bo por tuma e siguiente medidanan
Sòru pa bo kas i kurá ta den bon kondishon, di manera ku artefakto òf brasa di palu ku ta bula rònt no por okashoná daño durante e mal tempu.
Pone tur bo dokumentu- i potrètnan huntu i warda nan den un saku di plèstik ku awa no por drenta den. Tin biaha dokumentunan di identidat no ta fasil pa remplasá i por dura largupromé ku nan traha nobo.
Protehá bo bentananan ku plachinan di multiplèks òf ‘duct tape’. E ‘duct tape’ bo ta plak den forma di un ‘X’ riba bo bentananan.
Sòru semper pa un pakete di emergensia. Un pakete di emergensia ta konsistí entre otro di sèn èkstra, bateria, flèshlait, bòter di awa, papel di wc, kuminda ku no ta daña lihé, kos di habri bleki, bela, remedi èts.
Sòru pa bo telefon selular semper ta kargá.
Hinka tur bestia di kas paden. Despues ku e mal tempu pasa ta peligroso ainda pa sali buska bestia di kas ku ta pèrdí.
Saka potrèt òf hasi un grabashon di bo kas promé ku e orkan / tormenta tropikal. Si ta nesesario esaki por ta útil pa un eventual lista di mobilario i otro artíkulonan di kas pa seguro.
Sigui e anunsionan di wer pa medio di www.knmidc.org, radio i televishon. Chèk tambe e página di facebook ‘Gobièrnu di Boneiru’ pa informashon di e tim di kombatimentu di desaster.
Informá bo miembronan di famia tokante e instrukshonnan ariba menshoná.
Durante e maltempu bo mester tene kuenta ku lo siguiente
Sòru pa bo mes seguridat i seguridat di bo famia!
Ta importante pa keda paden i sigui tur ‘update’ pa bo region. Kon grandi e tentashon por ta pa filma i/òf saka potrèt di e maltempu, no hasi’é. Paden bo ta keda seku i seif.
No subi laman si nan ta deskonsehá esaki.
Keda den e parti di bo kas ku no tin bientu dirèkt riba dje. Si por ehèmpel bientu ta dal kontra bentananan di sala, e ora ei ta mihó ku bo ta den un otro parti di bo kas.
Si bo no por skonde na kas, serka famia i /of amigu, konsiderá e ora ei pa evakuá bai e sentro di akohida ku ta keda mas serka.
Tene e páginan di facebook ‘Gobièrnu di Boneiru’ na bista pa mas informashon tokante e sentronan di akohida disponibel.
Despues di e maltempu bo mester tene kuenta ku lo siguiente:
Purba pa mas tantu posibel bo mes drecha e daño promé ku bo yama e servisionan di ayudo. Esaki ta evitá ku innesesariamente bo ta tene e timnan di reskate okupá, mientras ku otronan mester di ayudo urgente.
Tene e página di facebook ‘Gobièrnu di Boneiru’ na bista pa mas informashon.
