Yamada pa mas responsabilidat i seguridat den tráfiko

Siguridat 17 november 2026

Den kuadro di Dia Mundial di Konmemorashon di Víktimanan den Tráfiko, Diputado di Komunidat i Kuido, Timoteo Silberie, ta pidi atenshon pa importansia di seguridat den tráfiko.

Komportashon responsabel i kumplimentu ku regla di tráfiko ta esensial pa prevení aksidente i protehá tur usuario di kaminda, inkluyendo outomobilista, koredó di motosaikel, siklista, peaton i usuario di fatbike.

“Tras di kada aksidente tin personanan, famianan i un komunidat ku ta sinti e doló. Nos mester sigui traha huntu pa mas responsabilidat, rèspèt i seguridat riba kaya,” segun Silberie.

E diputado ta hasi un yamada riba tur usuario di kaminda: baha velosidat, no usa telefòn tras di stür, no partisipá na tráfiko ora bo ta bou di influensia, bisti protekshon adekuá i tene kuenta ku peaton, mucha, hende grandi i siklista.

Uso iresponsabel di fatbike serka algun hòben tambe ta un motibu di preokupashon. Velosidat haltu, falta di protekshon, uso di telefòn ora nan ta kore nan fatbike i keda sin kumpli ku regla di tráfiko por pone tantu e hòben komo otro usuarionan di kaminda na peliger. Mayornan, skolnan i organisashonnan hubenil tin un rol importante na momentu di siña komportashon seif i responsabel den tráfiko.

Niun famia no mester pèrdè un ser kerí pa motibu di un desishon iresponsabel den tráfiko. Seguridat den tráfiko no ta responsabilidat di un solo persona: e ta un kompromiso di nos tur.

Un solo desishon huisioso den tráfiko por salba un bida. Nos tur tin un ròl den protekshon di otro.