Despues di ocho luna di trabou, proyekto di restourashon di Waf di Piskadó na Playa Pabou a keda finalisá i entregá na Gobiernu di Boneiru. E siman aki a pone e último plankinan di palu riba e pir, markando final di un proyekto ku tin komo meta pa brinda mas seguridat, durabilidat i fasilidat pa piskadónan i otro usuarionan di laman.
E proyekto a kuminsá na kuminsamentu di aña, ku e planifikashon pa finalisá e trabounan den seis luna. Debí na diferente trabou adishonal ku a surgi durante e proseso i e tempu di entrega di materialnan spesialisá, e proyekto a tuma dos luna mas ku e planifikashon original, loke a trese e durashon total na ocho luna.
Durante e trabounan, a kita e dèk di palu i desmantelá e konstrukshon di heru. A prepará i mehorá e stakanan, pa por a instalá un herante nobo di heru i pone un dèk nobo di palu, ku ta inkluí plankinan movibel ku por kita durante kondishonnan di mal tempu.
Diputado di Planifikashon i Desaroyo, sr. Dennis Martinus, a ekspresá ku Gobiernu di Boneiru ta sumamente kontentu ku por a kompletá un proyekto mas, dirigí spesífikamente na benefisio di piskadónan di Boneiru. Segun Diputado Martinus, piskadónan ta hunga un ròl sumamente importante den nos komunidat, spesialmente pa nan kontribushon na suministro di kuminda lokal. “Kolegio Ehekutivo ta sostené e trabou ku e piskadónan ta hasi. P'esei nos ta invertí tempu i dedikashon pa garantisá ku nan tin bon fasilidat pa por sigui hasi nan trabou”, segun diputado Dennis Martinus.
Ku e proyekto aki, Gobiernu di Boneiru ta mustra su sosten pa e sektor di peska i ta rekonosé e kontribushon diario di piskadónan na nos komunidat.
Presidente di Piskabon, sr. Ernest de Lanooy, a ekspresá su satisfakshon ku a kompletá e proyekto i a indiká ku e pir nobo lo alivia i fasilitá e trabou diario di e piskadónan. E piskadónan ta sali tur dia bai laman pa buska nan pan di kada dia, i pa nan ta sumamente importante pa tin un pir bon, sigur i adekuá kaminda nan por mara nan boto i hasi nan trabou. De Lanooy a resaltá ku loke ta importante ta ku e waf ta operashonal i ku boto por mara na e pir. Piskabon ta sumamente agradesí na tur persona i organisashon ku a kontribuí na e proyekto.
Segun sr. Ligwino (Gino) Leito, Direktor Interino di Planifikashon i Desaroyo, entrega di Waf di Piskadó ta un “milestone” pa Direktorado di Planifikashon i Desaroyo. E proyekto ta representá resultado di un proseso di trabou, koordinashon i kolaborashon pa mehorá e infrastruktura i fasilidatnan destiná pa piskadónan di Boneiru.
Ademas di e trabounan di konstrukshon, e siguiente paso ta koordinashon pa fasilidatnan di lus i awa, ku mester realisá den konsulta ku Piskabon. Tambe lo elaborá un maneho pa uso di e pir, ku lo duna mas klaridat tokante organisashon i uso di e infrastruktura, ku atenshon spesial na nesesidat di e piskadónan i otro usuarionan di laman. E meta ta pa hasi e pir mas práktiko, organisá i adekuá pa tur su usuarionan.
E mantenenshon i restourashon di Waf di Piskadó na Playa Pabou ta resultado di un kolaborashon entre Entidat Públiko Boneiru, Rijkswaterstaat, Piskabon, Streefkerk, STINAPA i Havenmeester. Ku e proyekto finalisá i entregá na Gobiernu di Boneiru, e partnernan a kontribuí na un infrastruktura ku ta destiná pa sigui sirbi piskadónan, usuarionan di laman i komunidat di Boneiru durante hopi aña.
