Trabounan di mantenshon di Pir di Piskadó na Playa Pabou ta kontinuá, ku e meta pa entregá un infrastruktura sigur, duradero i adekuá pa piskadónan i otro usuarionan di laman na Boneiru.
Durante desmantelamentu di e konstrukshon di palu i heru eksistente, a deskubrí ku e parti superior di e stakanan tabata den un estado di deterioro mas grave ku tabata sperá. Abase di un investigashon tékniko a determiná un intervenshon/solushon ku no ta rekerí remplaso di e stakanan kompletu bou di awa. En bes di esaki, a reforsá nan ku un konstrukshon di heru, yamá “sleeve”, ku ta bai rondó di e stakanan eksistente i yená ku beton. E método aki ta garantisá mas stabilidat i ta prolongá e bida útil di e infrastruktura.
Un bentaha importante di e solushon aki tabata ku e stakanan bou di awa por a keda intakto, evitando trabounan adishonal riba fondo di laman. Esaki a limitá e impakto riba ekosistema marino i a yuda protehá koralnan i otro bida bou di awa.
Pa e parti superior di e pir, lo instalá plachinan di palu duradero durante e dianan aki, adekuá pa ambiente marino i resistente na awa salu. Esaki lo redusí e nesesidat pa mantenenshon den futuro. Debí na e trabounan adishonal i e tempu di entrega di materialnan spesialisá, e fecha di finalisashon i entrega di e pir a kambia pa final di aña 2026.
Paralelamente na e trabounan di konstrukshon, lo elaborá un maneho pa uso di e pir, ku lo duna klaridat tokante su organisashon i uso, ku atenshon spesial pa piskadónan, pa hasi e pir mas práktiko i adekuá pa tur su usuarionan.
Mantenshon di waf di piskado na Playa pabou ta un kolaborashon entre Entidat Públiko Boneiru, Rijkswaterstaat, STINAPA i Havenmeester. Ku e trayekto aki, e partnernan ta invertí den un infrastruktura ku lo sigui sirbi piskadónan, usuarionan di laman i komunidat di Boneiru durante hopi aña.
