Micheila Trinidad, ganadó di e akshon di gana ‘Boneiru ta bai PSV’, huntu ku su yu muhé Allisha Trinidad, dia 15 di òktober a eksperensia un dia spesial na Eindhoven. Durante nan bishita nan a sera konosí ku diferente komponente di PSV, nan a tira un bista tras di kòrtina di e klup i nan a eksperensiá e mundu di futbòl profeshonal djaserka.
Pa Allisha, ku e mes tambe ta forma parti di un tim di futbòl na Boneiru, e bishita tabata èkstra spesial. E bishita a brinda Allisha un oportunidat pa deskubrí e ambiente di futbòl profeshonal di PSV i eksperensiá un treinen di e ekipo feminino di PSV djaserka. E eksperensia akí a forma un bunita oportunidat pa haña inspirashon, optené impreshonnan nobo i sigui fortifiká su entusiasmo pa futbòl. Banda di esaki mama i yu por a gosa huntu di un eksperensia úniko i krea rekuerdonan balioso.
E programa a kuminsá parti mainta ku un rekorido na De Herdgang, e kompleho di treinen di PSV. Seguidamente Micheila i Allisha a haña oportunidat pa presensiá un parti di e treinen di e ekipo femenino di PSV. Na final di esaki tabatin espasio pa kolektá firma. E dia a kontinuá ku un rekorido den Phillips Stadion. Durante e rekorido akí nan a haña oportunidat pa deskubrí e stadion i e mundu tras di e klup mas aleu.
Tourism Corporation Bonaire (TCB) a organisá e akshon di gana ‘Boneiru ta bai PSV’ i ‘PSV ta bai Boneiru’, den kolaborashon ku PSV i Entidat Públiko Boneiru. Marjolein Oleana, Business Manager & Europe Liaison na TCB, ta kontentu ku nos poblashon lokal di Boneiru tambe ta haña chèns pa optené eksperensianan spesial.
“Ta algu bunita ku habitantenan di Boneiru, danki na e kolaborashon akí, por atkerí eksperensianan i inspirashon nobo. Ku Micheila por a eksperensiá esaki huntu ku su yu muhé Allisha, ta hasié èkstra spesial. Pa deportistanan hóben un bishita asina por ta un bunita estímulo pa sigui desaroyá nan mes,” segun Oleana.
E bishita na Eindhoven ta forma parti di e premio ku Micheila a gana ku e akshon di gana ‘Boneiru ta bai PSV’. E biahe a brinda mama i yu un oportunidat pa eksperensiá PSV djaserka i pa sera konosí ku e ambiente deportivo i kultural di e region di Brainport.
E kolaborashon entre Entidat Públiko Boneiru i PSV a ranka sali na aña 2022 i e ta enfoká riba fortifikashon di e lasonan sosial, deportivo i ekonómiko entre Boneiru i e region di Brainport na Eindhoven. Desaroyo di deporte, desaroyo di talento i interkambio di konosementu ta forma komponentenan importante di e kolaborashon akí. Desaroyo di futbòl femenino tambe ta haña atenshon spesial den esaki, ku komo meta pa krea mas posibilidat pa mucha muhé i hende muhé pa desaroyá nan mes den e deporte akí. Dentro di e kolaborashon, TCB ta responsabel pa merkadeo i promoshon di Boneiru.
Ku e akshon di gana akí e partnernan di kolaborashon ke sigui fortifiká e laso entre Boneiru i Eindhoven, i enbolbí habitantenan di Boneiru aktivamente ku e kolaborashon akí. E bishita di Micheila i Allisha ta mustra kon deporte, turismo i interkambio kultural por konektá hendenan i regionnan ku otro. Na mes momentu e ta brinda deportistanan hóben manera Allisha un posibilidat pa optené inspirashon pafó di nan propio ambiente i deskubrí perspektivanan nobo.
Tourism Corporation Bonaire ta gradisí PSV, i spesialmente Laurens van Leuken, pa e resepshon i e oportunidat pa hasi e eksperensia spesial akí posibel. TCB ta ekspresá su gratitut tambe na Corendo pa a spònser e pasashinan ku avion.
