Entidat Públiko Boneiru ta felisitá Selibon ku finalisashon eksitoso di e ouditoria eksterno di ISO den luna di novèmber 2026. E organisashon LRQA, spesialisá den kontrol i sertifikashon, a evaluá Selibon su sistemanan di kalidat, servisio i protekshon di medio ambiente.
For di aña 2015 Selibon ta traha konforme e normanan internashonalmente rekonosé ISO 9001 i ISO 14001. ISO 9001 ta enfoká riba kalidat, konfiabilidat i efisiensia di rekohementu di sushi, prosesamentu di sushi, dunamentu di servisio i maneho interno. ISO 14001 ta enfoká riba dominio di riesgo di medio ambiente na momentu di rekohementu di sushi, prosesamentu di sushi i maneho di lugá di deposita sushi, entre otro kontaminashon di suela, emishon, fluho di sushi i kumplimentu ku pèrmit di medio ambiente.
“Finalisashon eksitoso di e ouditoria akí ta mustra ku Selibon ta sigui invertí den bon servisio i maneho responsabel di medio ambiente. Esaki ta importante pa un Boneiru limpi i sostenibel. Nos ta felisitá Selibon i tur empleado ku e bunita resultado akí i nos ta gradisí nan pa nan kompromiso diario ku nos isla”, segun diputado Dennis Martinus.
