Entidat Públiko Boneiru (EPB) a otorgá e siman akí e distinshon Chapi di Lucha 2026 na Sint Michael Groep Rincon i Cherel Kwidama. Ku e distinshon akí EPB kier ekspresá su apresio pa nan añanan di dedikashon i kontribushon na komunidat boneriano.
69 aña di dedikashon na hubentut i komunidat
Sint Michaël Groep Rincon a risibí e distinshon pa 69 aña di dedikashon na hubentut i komunidat boneriano. E grupo di scouting ta yuda hóbennan den nan desaroyo personal i ta siña nan balornan manera disiplina, responsabilidat, liderazgo i solidarismo. Generashonnan di boluntario a dediká nan mes na esei. Un papel importante pionero, Pachi Ruby, a desplegá, kende a kontribuí na desaroyo di scouting na Rincon i na formashon di lidernan nobo. Otro lidernnan tambe a dediká nan mes dékadanan largu na guia hóbennan. Aparte di aktividatnan di scouting, e grupo ta kontribuí tambe na aktividatnan sosial, kultural i edukativo. Por ehèmpel, e ta stimulá hóbennan pa asumí responsabilidat i kontribuí aktivamente na komunidat.
Un posishon mas fuerte pa trahadó
A kondekorá Cherel Kwidama pa su kompromiso ku derecho di trahadó i trabou sindikal na Boneiru. Na 2019 el a asumí presidensia di sindikato ‘Algemene Federatie van Bonairiaanse Werknemers’ (AFBW). E tempu ei e sindikato tabata konfrontando retonan grandi. Bou di su guia a reorganisá i fortifiká e organisashon finansieramente. E kantidat di miembronan a krese di mas òf ménos 350 na mas di 1.000. e kantidat di kompanianan afiliá tambe a oumentá, di kuater na binti. Ademas AFBW a hasi esfuerso pa mihó kondishonnan laboral, entre otro pa medio di negosiashonnan tokante kontratonan laboral kolektivo (cao). Ku su esfuerso, sr. Kwidama a kontribuí na un posishon mas fuerte di trahadónan na Boneiru.
Nifikashon di Chapi di Lucha
Chapi di Lucha ta un distinshon ofishal di EPB, ku, desde 2003, EPB ta otorgá na persona- i organisashonnan ku ta duna un aporte speshal na komunidat. E nòmber ta referí na e rebelion riba 10 di novèmber 1834 di personanan sklabisá, bou di guia di Martis Cathalina Janga. E suseso akí ta simbolisá e lucha kontra opreshon i inhustisia.
E distinshon ta para pa kurashi, perseveransia, hustisia i solidarismo. E balornan akí ta kuadra ku e esfuerso pa un komunidat fuerte i ta forma tambe un vínkulo importante ku e trabou di SKAL, e sekshon di kultura, arte I literatura di EPB.
