E habitantenan di Boneiru ta gusta nan ambiente di biba natural, tantu bou komo riba awa i ta sinti nan mes fuertemente mará na esaki. Nan ta kontribuí na mantenshon i desaroyo di nan ambiente di biba. Entidat Públiko Boneriano ta rekonosé e parti importante aki i ta duna direkshon na protekshon i mantenshon di naturalesa i medio ambiente di Boneiru.

Bonaire National Marine Park (parke nashonal di naturalesa)

Bonaire National Marine Park ta henter e área di laman rònt di Boneiru, desde e liña di superfisie di laman te na un profundidat di sesenta meter. E ta kubri 2.600 hèktar di ref di koral, vegetashonnan di yerba di laman i palu di mangel, ku pa mayoria parti ta den bon kondishon. Lac i Klein Boneiru tambe ta pertenesé na e parke bou di laman. E diversidat di refnan di koral ta sumamente grandi. E parke supmarino ta internashonalmente konosí i di interes ekonómiko grandi. Spesialmente turismo di buseo ta duna un kontribushon importante na e entradanan di e poblashon boneriano. Bonaire National Marine Park ta instituí legalmente basá riba e ordenansa di medio ambiente marino. E parke ta manehá pa STINAPA. STINAPA Boneiru a diseñá un plan di maneho pa e parke marino, inklusive Lac i Klein Boneiru.

Lac (parke nashonal di naturalesa)

E área di naturalesa di Lac ta 700 hèktar grandi i ta enserá henter e bahia di Lac,inklusive Cai, Sorobon i 500 meter di zona protehá desde e nivel mas haltu di laman rònt di e region di awa. Bahia di Lac ta úniko pa Boneiru pa motibu di presensia di yerba di laman i palu di mangel. Lac ta un lugá importante di sosiegu, lugá di brui i di alimento pa kantidat di para di laman, bestia i piskánan di laman. Pa hopi piská di koral Lac tin un funshon di kamber di parto. Turtuga blanku i karkó ta usa e bahia aki komo nan lugá pa haña kuminda. Lac ta forma parti importante di e historia kultural di Boneiru i ta un teritorio di rekreo popular. Lac ta área di awa protehá den kuadro di e tratado di Ramsar.

Klein Bonaire (parke nashonal di naturalesa)

E isla no habitá aki tin un superfisie di masoménos 700 hèktar i e ta rondoná pa refnan di koral hopi bunita. E área di naturalesa legalmente protehá aki ta forma parti di Bonaire National Park. E playanan na parti nort i pabou di e isla ta e lugánan mas importante kaminda turtuganan ta pone webu. Riba e isla tin sigur 76 sorto di mata i masoménos 55 sorto di bestia, bou di kua algun ku ta hopi skars. Dor di su balornan di naturalesa, karakter trankil i posishon dilanti kosta di e kurason ekonómiko di e isla mama, e isla aki ta úniko den region di Caribe. Klein Boneiru ta un teritorio indiká di Ramsar, prinsipalmente debí na e refnan rònt di dje, pero tambe pa motibu di algun saliña riba e isla.

Peleké (reservado)

E área di 800 hèktar aki ta enserá e Peleké original, inklusive e área den e parti sùit kaminda awa ta drenta i e teritorio ku dam na su kantunan, na unda flamingonan ta brui. Peleké i e reservado di flamingo ta e lugá di brui mas importante pa flamingo den e parti sùit di region di Caribe. Flamingo ta pone eksigensianan spesial na su besindario (kalidat di awa, trankilidat) i ta hopi sensitivo pa estorbo. Peleké i e reservado di flamingo ta indiká komo zona di awa di nifikashon internashonal segun e tratado di Ramsar. Cargill Salt Bonaire N.V. ta manehá e teritorio aki.

Parti sùit di Boneiru (parke di naturalesa insular)

OBou di Sùit Boneiru ta komprondé e parti sùit di Boneiru desde e banda nort di Trans World Radio te na Sorobon (siguiendo Kaya Ir. Randolph Statius van Eps), ekskluyendo e zona industrial di Cargill Salt Bonaire i Trans World Radio i ekskluyendo Peleké. E teritorio aki komo totalidat ta dirigí riba protekshon duradero di e lugá di brui i biba di flamingo.

Paisahe di terasa Meimei-Boneiru (parke di naturalesa insular)

E paisahe di terasa Meimei-Boneiru ta e área di seru entre Fontein, Seru Largu, e kosta wèst di Boneiru i Gotomeer. Bou di esaki ta kai entre otro e terenonan grandi (anterior plantashi) di Karpata, Tolo, Colombia i Fontein, tambe e área di Kibra'i Montaña. E teritorionan den e serunan sùit i pariba di Rincon ta salvahe i no fásilmente aksesibel. P'esei a usa nan ménos pa desaroyo di kultivo ku e terenonan situá den vaye. E paisahe di terasa ta konsistí di e teritorionan di Roi Sango, Tolo i Colombia. E áreanan di naturalesa aki ta di gran importansia pa naturalesa na Boneiru. Ta topa ku hopi di e sortonan di mata ku tin na Boneiru. E teritorionan aki teritorio di biba i kome di kantidat di para endémiko i otro sortonan di bestia.

Brasa-Labra (parke di naturalesa insular)

Bou di Brasil-Labra ta komprondé e teritorio original di Brasil i Labra, ku eksepshon di e tereno di BOPEC i e parti pariba situá nort di BOPEC, ku ta kompletamente enserá dentro di e parke nashonal di Washington Slagbaai. Ta trata di un teritorio ku diversidat haltu di uso tradishonal, bou di kua peska (Playa Frans) i ántes agrikultura (Labra). E ta poseé elementonan eksepshonal ku un balor di paisahe i balor sientífiko pa loke ta trata su naturalesa. Saliña Tam i Saliña di Playa Frans i e seru Wecua tambe ta kai den e teritorio aki. Banda di esaki tin tambe teritorionan importante pa bruimentu i sosiegu di paranan, esplísitamente e lora.

Parke Nashonal Washington Slagbaai (parke nashonal di naturalesa)

A instituí Parke Nashonal Washington Slagbaai komo e promé parke di Antia Hulandes na 1969. E área di naturalesa aki ta kubri 6.000 hèktar. E parke ta akomodá un kantidat di teritorionan di biba, entre kua e seritunan di santu (duinen) na e bokanan na kosta nort, e saliñanan, e pos i áreanan di seru. Saliña Slagbaai i Gotomeer ta indiká komo teritorionan di Ramsar. E parke ta di gran importansia komo último lugá na unda e flora i founa lokal por biba den tur trankilidat, entre kua lora, prikichi, falki i yuana. Tambe for di punto di bista kultural-históriko e parke ta di nifikashon grandi, entre otro pa motibu di e plantashinan i historia di Slagbaai. E parke aki ta haña e status di parke nashonal di naturalesa asina ku e haña protekshon legal. STINAPA Boneiru ta manehá e parke.

Parke di paisahe Rincon (paisahe protehá)

Pa motibu di e nifikashon kultural-históriko di e terenonan rònt di Rincon gobièrnu insular ta hasi esfuerso pa mantené e teritorio aki komo parke di paisahe. Esaki ta establesé den e Plan di Maneho di Naturalesa. E patronchi di kunuku, kaminda i lugánan na unda tin awa, a desaroyá atraves di siglonan i ta forma parti di e patrimonio kultural-históriko di e isla. Meta di e parke di paisahe ta pa brinda e poblashon di Rincon e posibilidat pa mantené balornan kultural i di naturalesa di nan bario, dor di kua Boneiru lo ta den posishon pa desaroyá su mes na un manera duradero. Plataforma Rincon a krea diferente ruta nobo pa kana den e futuro Parke di Paisahe Rincon.

Riba petishon di Plataforma Rincon CARMABI a hasi un estudio di e balornan di naturalesa i kultural-históriko di e anterior plantashi Onima. Ta usa resultadonan di e investigashon aki den e buskamentu di fondo pa logra kumpra e teritorio aki.

Kuebanan

Komo forma di aparensia geológiko kuebanan ta duna un bista di e historia di mas bieu di e isla. Na diverso sitio por topa ku pintura den kueba, poné einan pa e habitantenan indjan original di Boneiru. E kuebanan aki ta spesialmente importante tambe pa e futuro eksistensia di ratonnan djanochi. Esakinan tin un funshon importante den e ekosistema boneriano. Ratonnan djanochi ta pertenesé na e tiki mamíferonan endémiko riba tera.

E kuebanan aki ta pertenesé na patrimonio di Boneiru. Te ora ku indiká e kuebanan aki komo monumento di naturalesa basá riba e Ordenansa Maneho di Naturalesa, e kombenio di kueba ta konta. Firmantenan di e kombenio aki por organisá ekskurshon pa kuebanan. Nan ta Buddy Dive, Bonaire Eco Experience, Bonaire Guide Services, Plaza Resort Bonaire, Captain Don's Habitat i Black Burgon Inn.

Saliña

Saliñanan ta traha komo un zona di protekshon, komo ku nan ta sòru pa akohida i infiltrashon di awa di yobida. Asina ta prevení ku nutrientenan i partinan di suela ta resultá riba ref i kondusí na daño na koralnan. E funshon aki ta spesialmente importante na momentu di yobida fuerte. Nan ta tambe teritorionan importante pa kantidat di para (di awa).

Saliña di Slagbaai, Gotomeer, Peleké i e saliñana riba Klein Boneiru ta di importansia internashonal den kuadro di e tratado di Ramsar. Di akuerdo ku e Plan di Maneho di Naturalesa, no por konstruí na òf koba den e saliñanan aki. Pa eventual intervenshon den e teritorionan vulnerabel aki mester traha un reportahe di e efektonan riba medio ambiente, for di kua ta resultá ku no ta afektá funshon di e saliña konserní.

Lista di patrimonio mundial

E esfuersonan pa logra un nominashon di e parke bou di laman dor di e Lista di Patrimonio Mundial di UNESCO ta di gran importansia pa maneho duradero di e parke i ta forma un estímulo importante pa turismo. E nominashon den preparashon ta konosí bou dje nòmber 'Las Islas del Caribe Sur'; un proposishon ultra-fronteriso di e parkenan bou di laman huntu di Boneiru, Kòrsou, Las Aves i Los Roques. Desaroyonan resien riba tereno estatal i polítiko sinembargo ta trese hopi insiguridat pa e nominashon aki.