Text Size

Font size:  
  • Increase
  • Decrease
  • Normal

Current Size: 100%

Músika ta un faktor importante mará dentro di e kultura lokal di Boneiru. E músika lokal tin kantidat di influensia djafó ku a enrikesé ainda mas. Generalmente por konkluí ku e músika baliabel boneriano ta di orígen afrokaribense i ta demostrá similaridat ku esun di e área den besindario. Di un influensia hulandes no por a papia.

Pa e bailenan popular típiko tabata hasi uso di instrumentonan manera tambú, bastèl, benta, agan, kachu, chapi, wiri, maraka i kaha di òrgel. E instrumentonan primitivo ku katibunan tabata usa, tabata karkó, tambú, bastèl, benta, kachu i agan, triangel, wiri, bamba (na Boneiru) i chapi.

Bonerianonan ta mustra simplemente di ta riku si ta trata di trahamentu di instrumentonan musikal, popular den barí i tambú. Esaki ta konsistí di un silinder chikitu ku un kueru di kabritu di span riba dje. Den e kantikanan ta zona e tradishon meskos tambe e amor di e boneriano pa su isla i naturalesa.

Bastèl

Bastèl ta un instrumento di reperkushon ku ta konsistí di un tobo yená tres kuart ku awa i un mitar kalbas (crescentia cujete) ku ta keda drif ku su parti hòl riba e awa. Ta toka bastèl ku tòp di e dedenan di kua ta toka riba e kantu bòl di e kalbas.

Bekú

Beku ta instrumento musikal trahá di stèngel hòl di palu di maishi di un largura di 40 pa 50 centimeter i 2 centimeter diki. Na mas òf ménos 3 centimeter di kada un buraku, sinembargo riba un liña ku ta formá dor di dos buraku, dor di e largura di e stèngel ta kòrta un lenga, dor di kua ta supla i hala. Ta haña e diferensia di e altura di tono dor di sera i habri e burakunan ku dùim.

Benta

Un instrumento musikal konsistiendo di un taki doblá di kohara (cordia alba), òf un otro tipo di palu tai, riba kua ta span e fibra di un blachi di koko. Ta pone e lepnan habrí na un di e puntanan di e bog pa asina e kavidat di boka por sirbi pa resonadó. Pa por saka tono ta pone e fibra den moveshon dor di un pida palu, manigueta, serka di e boka. Ta kambia e altura di tono dor di hasi e kavidat di boka mas haltu òf chikitu. Esaki ta sosodé ku moveshon di e lenga. Ta kambia e tenshon di e fibra dor di primi ku un pida metal òf ku e parti patras di un kuchú riba dje.

Bamba

Un instrumento musikal ku ta konsistí di dos pida bambu hòl, yamá kaña brabu. Ta haña e stèngel di e bambu riba kosta na Boneiru i Kòrsou. For di e stèngelnan aki, ku un kòrtá di mas òf ménos 7 pa 8 centimeter, ta kòrta dos pida di largura no igual, 60 i 70 centimeter. Ku eksepshon di e skòt abou ta bora tur e otro skòtnan. Ta kòrta e parti abou di e bamba ku ta bira 10 centimeter bou di e skòt ku no ta borá. Ta toka bamba rítmikamente dor di bati’é duru abou.

Kachu

Instrumento di aire trahá di kachó di baka, mas òf ménos 35 centimeter largu. Ta kòrta e punta di e kachu 6 òf 8 milimeter dor di kua ta forma un buraku ku dede por drenta. Riba un distansia di un terser parti di e kachu, midí for di e punto, ta bora un otro buraku di mas òf ménos 2 centimeter na e parti bòl di e kachu dor di kua por supla ku boka. Ta toka e instrumento aki ku mesun tékniko di blas di un trompèt, miéntras ta kambia e altura di tono ku moveshon di dede na e parti habrí i ku sea e dede ta sera òf habri e buraku di e kachu.

Wiri

Un instrumento trahá di un pida heru, koper òf stal, ku ta dobla den su largura te na un silinder kompleto òf mitar. Duars riba e silinder, den su largura kompleto, ta veilu skrefnan riba kua durante tokamentu ta pasa un staf di heru fini pa asina saka ritmo.

Karkó

Karkó (Strombus gigas) ta e bestia di kokolishi di mas grandi na Boneiru. Tabata usa kaska di karkó ántes hopi komo instrumento di aire pa tur tipo di okashon, miéntras piskadónan na momentu di kaida di bientu tabata supla e kaska di karkó pa lanta e spiritunan for di soño.