Text Size

Font size:  
  • Increase
  • Decrease
  • Normal

Current Size: 100%

Industria di salu

Cargill Salt Bonaire N.V. ta produsí 400.000 barí di salu industrial pa aña. Un parti hopi chikitu di e salu eksportá ta destiná pa uso den kushina i ta bende 1% na piskadónan lokal i panaderonan. Boneiru ta ofresé un kalidat di salu úniko ku kristalnan grandi di salu, debí na un kombinashon úniko di faktor: awa ku un superfisie plat i hundu, bientu i hopi solo, ideal den e proseso di evaporashon. Cargill tin un bon ret di distribushon i bon organisashon di benta. Cargill ta interesá pa ekspandé pa Sur Amérika den merkadonan nobo. Pa mas informashon, por manda e-mail na nancylucas@cargill.com.

Saber i enseñansa

Un di e terenonan, ku por ta interesante pa invershonistanan for di eksterior, ta e tereno di saber i enseñansa. Boneiru ta ofresé un ambiente i infrastruktura atraktivo pa establesimentu di skolnan di hotèl i edukashonnan médiko, unda dunamentu di lès, estudio, akomodashon i rekreo tur por tuma lugá na un (1) sitio. Gobièrnu ta ofresé espasio pa konstrukshon di universidat, fasilidatnan médiko i institutonan di kuido ku e posibilidat pa ekspandé. Por apliká insentivonan di impuesto durante algun aña i ta ofresé un prosedura fleksibel pa pèrmit di estadia pa tantu studiante komo dosentenan. E isla ta ofresé lokalidat pa kongreso, e tin hotèl, restorant i buelonan diario pa Merka.

Kompanianan di utilidat

Water en Energie Bedrijf Bonaire (WEB) ta un kompania di gobièrnu ku ta distribuí awa i elektrisidat riba e isla. WEB ta buskando posibilidatnan pa produsí awa i elektrisidat na un manera duradero, hasiendo uso di rekursonan natural riba e isla, manera bientu i solo.

Resiklahe

Servisio di Limpiesa di Boneiru (SELIBON) ta e úniko kompania ku ta prosesá sushi na Boneiru. E ta kolektá i prosesá sushi, i ta tene kuenta den esaki ku medio ambiente i ku reglanan ku ta lokalmente bálido. SELIBON ta traha riba e siguiente proyektonan: separá sushi, kolektá glas apart i resiklahe di esaki.

Telekomunikashon

Telefonia Bonairiano N.V. (TELBO) ta e úniko empresa ku ta ofresé servisionan di telefon pa e merkado lokal (lokal, mobil, distansia largu). TELBO ta buskando partnernan stranhero òf lokal pa konhuntamente desaroyá merkadonan (internashonal) mas aleu. TELBO ta ofresé servisionan di data-center na Boneiru.

Turismo

Boneiru tin hopi posibilidat pa invertí den sektor turístiko, manera desaroyo di hotèl, restorant i otro fasilidatnan rekreativo, ku ta kontribuí na ekonomia di Boneiru. General: parselanan na laman/ku bista riba laman, disponibel pa desaroyo di hotèl, pero tambe parselanan sentral ku posibilidatnan komersial. Proyekto spesífiko: pone e proyekto no-kompletá di ‘Resort Esmeralda’ disponibel pa desaroyo òf pa hasi algu otro na e sitio aki (situá na laman).

Transporte

Bonaire International Airport (B.I.A.) ta un aeropuerto kompletamente ekipá ku tur fasilidat i infrastruktura pa sirbi buelonan internashonal kòrtiku i mas largu. A ekspandé e pista di aterisahe te 2880 meter, loke ta hasi aterisahe i despegue di avionnan grandi ku karga. Un staf bon entrená i tur e empresanan nesesario ta ofresé un servisio 24 ora pa dia durante 7 dia pa siman, manera limpiesa di avionnan, servisionan di WC, awa, atendimentu di karga. Diariamente avionnan for di Hulanda, Merka, Sur Amérika i otro islanan di Caribe ta baha na Boneiru.