Text Size

Font size:  
  • Increase
  • Decrease
  • Normal

Current Size: 100%

Kralendijk – Pa konmemorá Lantamentu di Katibu di 10 di novèmber 1834 bou di guia di Martis di Katalina Janga, Gobièrnu di Bonaire pa medio di Sekshon Kultura Arte Literatura (SKAL) for di aña 2003 ta otorgá e asina yamá Chapi di Lucha.

Pa medio di Chapi di Lucha ta duna rekonosimentu na esnan ku di un òf otro forma a destaká den trabounan pa adelanto di komunidat boneriano riba tereno sindikal i esun sosial kultural. sr. Norwin Willem i Kor Kanta Orkidia e aña aki a risibí Chapi di Lucha. Diputado James Kroon remplasando diputado enkargá ku kultura sr. Edsel Cecilia riba e parti sindikalismo a trese dilanti ku resientemente huntu ku sindikatonan a hiba un lucha pa e parti di penshonadonan i e lucha ei no ta kla ainda, e lucha ei mester sigui mirando ku tin un apertura na horizonte i ku trabou duru lo logra esaki. Pa loke ta Kanta Orkidia e diputado a duna di konosé ku e organisashon semper a sa di trese e parti kultural folklóriko dilanti na un manera spesial. Finalmente diputado Kroon na nòmber di gobièrnu di Boneiru a gradisí sr. Norwin WIllem i famia i Kanta Orkidia pa tur loke nan a hasi pa Boneiru i ku meresidamente e Chapi di Lucha ta na su lugá. 

Aki ta sigui un kompilashon di Norwin Willem i Kant’i Orkidia. 

Na 1977 Nòchi a tuma e desishon pa muda pa Boneiru pa un ratu hiba un bida mas trankil. Sinembargo e un ratu ei a resultá den basta ratu, den sentido ku na aprel di e aña aki Nòchi a kumpli 40 aña bibá aki na Boneiru. For di chikí e tabatin dos karakterístika ku lo marka su bida, esta lanta para kontra inhustisia i yuda otro. E promé a hink’é hopi biaha den problema, ora e no tabata ria pa kumpra pelea di otro. E di dos, esta yuda hende na hopi okashon tabata resultá den desepshon. Apesar di tur detayenan ménos positivo ta é dos karakterístikanan ei a i ketu bai ta dominá su bida. Originalmente Nòchi a studia ku éksito e profeshon di maestro di skol pero semper e tabatin e deseo pa amplia su horizonte pafó di klas i pafó di skol. Nòchi den su bida a praktiká tambe deportenan manera beisbòl, pinpòn i bowling. E ta orguyoso ku komo mucha di pueblo e por a popularisá bowling ku e tempu ei tabata un deporte pa e grupo elitario na Kòrsou. Pa un temporada Nòchi a manehá  negoshinan nokturno ku tabata gosa di gran popularidat na Kòrsou, esta Watapana Bowling Club, Bunny’s Club, Jokers Club i El Sombrero i aki na Boneiru pa un temporada kòrtiku Diskotèk E WOWO. Lihé Nòchi a realisá ku ser negoshante/ komersiante no tabata su parti mas fuerte. Nòchi a militá den sindikalismo di 1980 te ku 1989 komo fundadó i presidente di Sindikato di  Maestronan Boneriano (SIMABO). Na 2009 trahadónan di Bopec a hasi un yamada riba dje pa asumí e posishon di presidente pa un aña pa finalmente e okupá e posishon aki pa tres aña klousurando e periodo ei firmando un CAO nobo ku basta adelanto pa e trahadónan. Lamentabel ta den e periodo ei ku no a logra organisá e trahadónan di e kontratistanan riba tereno di Bopec. Un deseo ku ketu bai ta biba serka dje. Na 2012, Nòchi ta hasi todo por todo pa uni e sindikatonan den un organisashon madre. Por sierto ta un intento ku el a hasi den añanan 80 den e tempu ei bou di e nòmber Frente Sindikal pero ku nunka a formalisá. E biaha aki sí ku esfuerso di tur e 7 presidentenan sindikal, dia 17 di aprel 2015 dilanti notario Arends a formalisá e lantamentu di Union Sindikal Boneriano abreviá USIBO. Di 2012 te ku 2016 Nòchi ta okupá e funshon di tesorero  den USIBO i ta kordiná tur aña selebrashon di Dia di Obrero. Na 2016, Nòchi a tuma retiro ofishal i ta nombr’é den e Kuerpo di Konseho di USIBO.E funshon aki e ta ehekutá ku hopi fervor i hasta for di mei di e aña aki e ta fungi komo sekretario interino. Tambe Nòchi ta konsehero di sindikatonan FEDEBON i AFBW den negosiashonnan pa CAO. Momentonan kulminante den Nòchi su karera sindikal tabata entre otro;

1.    Rekonosementu di dosentenan di praktijk na ambachtsschool di moda ku awe tur por disfrutá di un penshun na drechi.

2.    Igualdat di pago pa igual trabou, kaminda a para e deskriminashon kontra e hende muhé profeshonal den enseñansa.

3.    Penshun pa un kantidat di maestranan.

4.    Lantamentu di USIBO.

5.    Lantamentu di Diálogo Sentral ku partisipashon di sektornan komersial, gubernamental i sindikal pa atendé temanan soshal ekonómiko di Boneiru. 

Kompañeronan sindikal a tipifiká Nòchi komo ‘hòdòk’ ilustrando su inkietut grandi i su drive pa kosnan kana i keda kla. E echo ku Nòchi a drenta polítika i tabata aktivo di 1991 te 2003 komo kofundador i lider polítiko di Partido Boneriano Soshal ‘PABOSO’, ta manifestá su karakter i personalidat. Di 2004 te awor Nòchi ta produktor i presentadó di notisia na Voz di Boneiru i meskos t’e kaso di e programa Edishon Tra’i Notisia “Ami ta siña, Abo ta Siña i Huntu Nos ta Bai Dilanti”, un manifestashon di e sanger di dosente ku ta kore den su bena. Nòchi no konosé dia ni anochi, semper kla pa yuda siñando un kos masha esensial.Yuda sin spera danki i lo bo no tin desepshon sino satisfakshon. Kumpra pelea di otro si, pero awor ku konseho i kaminda por konsultá lei i buska konseho serka esnan mihó prepará i eksperenshá. Dia 8 di dezèmber awor ku poder di Dios Nòchi ta kumpli 70 aña di bida. Un bida kolorido, agitá ku hopi ‘subi baha’, pero alabes un bida den kua el a optené hopi konosementu i eksperensha di bida banda di e konosementu ku el a haña den banki di skol. Nòchi ta hiba e filosofia ku ora anochi e pone kabes riba kusinchi, ku no tin un sentimentu mas dushi ku e dia ei el a yuda maske ta un próhimo. Pa rasonnan menshoná, na okashon di konmemorashon di Lantamentu di Katibu 1834 bou di guia di Martis di Katalina Janga, Gobièrnu di Boneiru atraves di Sekshon Kultura Arte Literatura ‘SKAL’ ta kondekorá  Norwin C. Willem ku Chapi di Lucha 2017. 

Kanta Orkidia

E aña aki Gobièrnu di Bonaire/ SKAL a skohe Kor Kanta Orkidia komo organisashon pa risibí kondekorashon Chapi di Lucha 2017, den e kaso aki riba e área kultural. Kanta Orkidia ta un organisashon artístiko folklor kultural ku pa medio di obranan produsí a sa di relatá, konservá i dokumentá kultura i historia boneriano. Dentro di poko Kanta Orkidia ta bai selebrá su di 45 aña di eksistensia i partikularmente den kuadro di esei SKAL a proponé Gobièrnu di Boneiru pa e organisashon pa risibí Chapi di Lucha 2017. Dia dos di desèmber binidero Kanta Orkidia tin un grandioso show na Mangasina di Rei pa selebrá su di 9 lustro i pa e okashon ei di un forma mas amplio e historia di e organisashon lo bini den publisidat. Pa rasonnan menshoná, na okashon di konmemorashon di Lantamentu di Katibu 1834 bou di guia di Martis di Katalina Janga, Gobièrnu di Boneiru atraves di Sekshon Kultura Arte Literatura ‘SKAL’ ta kondekorá  Kor Kanta Orkidia ku Chapi di Lucha 2017. Ta bon pa añadí ku desde a introdusí Chapi di Lucha tabata personanan individual ku a risibí dicho rekonosimentu, esaki ta nifiká ku Kanta Orkidia a bira e promé organisashon/ agrupashon ku a risibí e rekonosimentu.