Text Size

Font size:  
  • Increase
  • Decrease
  • Normal

Current Size: 100%

Kralendijk - Sekshon di Kultura Arte Literatura ‘SKAL’, den kombinashon ku Ofisina di Turismo Boneiru ‘TCB’ ta organisá djabièrnè awor 22 di yüni, É Chispa di Wan Ku Pedu 2018. 
Ta trata aki di un evento ku SKAL a inisiá kuné na aña 2013, loke pues ta nifiká ku e evento ta kumpliendo su di promé lustro.
Meta di É Chispa di Wan Ku Pedu ta pa duna inisio n’e periodo di San Juan i San Pedro, kaminda for di algun dia promé ta kuminsá hinka nos pueblo i nos tambe bishitantenan/ turista den e esfera di e dos fiestanan kultural aki, kual nan respektivo fecha ta 24 i 29 di yüni.
 
É Chispa di Wan Ku Pedu e aña aki ta konta ku animashon musikal di Tutifruti i Nel i Su Grupo, ámbos grupo ku un repertorio konteniendo vários kansion tradishonal di San Wan ku San Pedu i otro kansionnan krioyo.
Tambe tin presentashonnan di Grupo di Baile Folklóriko Boneriano bou di direkshon di Angelo Domacasse.
Dama Kultural 2018 i Miss Turismo 2018 lo ta invitadonan spesial.  
Mas ku klaro e tradishonal i tan gustá bulamentu di kandela no por keda afó. Lo tin stèntnan ku kuminda krioyo i un bar bon surtí pa refreská e garganta.
  
É Chispa di Wan Ku Pedu 2018 ta tuma lugá djabièrnè awor 22 di yüni na ofisina di SKAL na Playa Pabou di 7or pa 12or anochi. Diputado enkargá ku kultura lo deklará e periodo di San Juan ku San Pedro habrí, esaki den forma simbóliko pegando e promé flambeunan p’e dos fiestanan.
 
SKAL ta invitá henter pueblo na É Chispa di Wan ku Pedu, asina kalentá pa e selebrashonnan tradishonal mes.
 
Selebrashonnan tradishonal:
Segun tradishon den diferente bario aki na Boneiru, ta selebrá e fiestanan kultural San Juan i San Pedro                         riba dianan 24 i 29 di yüni, inisiando ya for di bispu di respektivo fecha.
Anke ainda e selebrashonnan ta tuma lugá di un forma spontáneo o sea manera ántes, por tuma nota ku e último añanan esaki ta sosodé tambe ku sosten i kordinashon di organisashonnan sosial kultural di bario,
Asina por menshoná ku Fundashon Nawati i Fundashon Avanti tin na nan enkargo e selebrashonnan den respektivo barionan Nort Salina i Antriol.   
Pa djasabra awor tin selebrashon di San Juan den barionan Rincon, Nort Saliña, Antriol i Nikiboko ku Tera Corra. Bulamentu di kandela ta na e siguiente sitionan; na Rincon dilanti na kas di Nòchi Coffie, na Nort Saliña na altura di Mentor, na Antriol na Den Buraku Snèk i na Nikiboko/ Tera Corra den e sabana pariba di Bonbini Bar Restorant (Far East). SKAL ta spera ku e aña aki atrobe den tur bario e selebrashonnan di tantu San Juan komo San Pedro lo ta grandioso, demostrando asina ku nos pueblo sa kon pa mantené bibu su fiestanan kultural i folklóriko