Text Size

Font size:  
  • Increase
  • Decrease
  • Normal

Current Size: 100%

Dia 29 di sèptèmber un biaha mas mundialmente ta selebrá Dia Mundial di Kurason. World Heart Foundation – Fundashon Mundial di Kurason – a instituí Dia Mundial di Kurason pa informá hendenan i gobièrnunan tokante kousa- i peligernan di malesanan kardiovaskular. Mundialmente malesanan kardiovaskular ta kousa prinsipal di morto. Tur aña mas o ménos 17,5 mion hende ta muri komo konsekuensia di e malesanan aki.

 

Ku ‘Dia Mundial di Kurason’ World Heart Foundation ke trese un kambio drástiko den esaki konsientisando gobièrnunan i stimulando nan pa tuma akshon pa prevení malesanan kardiovaskular.

 

E tema prinsipal di e aña aki ta: ‘Mi kurason, bo kurason’.  Ta bai pa bo bisa bo mes, bo sernan kerí i sobra di mundu: ‘Kiko mi por hasi awor pa kuida mi kurason... i bo kurason mas mihó?’

 

E aña aki tur hende, adulto i hóben, tin chèns pa hasi un promesa; un promesa pa kushiná i kome mas salú, bebe mas tantu awa, move mas i stòp ku humamentu. Tin un yamada na nos tur pa yuda otro i apliká e promesa ku nos a skohe den nos bida diario.

 

Departamentu di Salubridat Públiko di Entidat Públiko Boneiru den kuadro di su tarea núkleo di prevenshon di malesa i promoshon di salú ta traha riba diferente programa pa konsientisá pueblo boneriano di e importansia di un estilo di bida salú.

 

Huntu ku skolnan di enseñansa primario i sekundario nos ta traha riba e programanan ‘Un Skol Salú’ i ‘JOGG – Hóben Sa Bo Peso Adekuá’. E programanan aki na promé lugá ta enfoká riba konsientisashon di hóbennan i naturalmente tambe mayornan i dosentenan, ku mester yuda i stimulá hubentut.

 

Pa e motibu aki diputado di Salubridat Públiko sr. E. Cecilia ke urgi tur hende pa den kuadro di nan abilidat pa yuda nan mes kurpa, tuma akshon nan mes pa prevení malesanan kardiovaskular, pero tambe otro malesanan króniko.

 

Drenta den akshon. Hasi bo mes un promesa i apliká esaki i traha riba un estilo di bida salú.     

 

HART,