Text Size

Font size:  
  • Increase
  • Decrease
  • Normal

Current Size: 100%

Kralendijk – Manera ta konosí, djasabra último, 28 di yüli, Nunsio Apostóliko Arsobispu Fortunatus Nwachukwu tabata di bishita aki na Boneiru. E religioso a realisá un bishita tambe serka miembronan di Kolegio Ehekutivo.

E Arsobispu tabata kompaña pa Su Ekselensia Obispu Luis Seco, Reverendo Pastrornan Curtis, Santiago, Ivan, Ranulfo i  sr. Morcos Gonzalez. Di parti di Kolegio Ehekutivo tabata presente diputadonan, sr. Kroon, sr. Martis, sr. Cecilia i sekretario di Entidat Públiko sra. Gonzalez.

Arsobispu Fortunatus Nwachukwu a duna un amplio splikashon di su trabounan komo religioso. Mas aleu den e kombersashonnan a toka tópikonan di atenshon, manera e relashonnan humano, edukashon di hubentut i famianan den komunidat di Boneiru ku mester kustumbrá ku tantu kambionan estatal. A pidi pa duna espasio na famianan  i siudadanonan na Boneiru pa ventilá nan nesesidatnan pa asina yega na un mihó  ekilibrio sosial riba nos isla.

Un punto di atenshon tambe ta duna atenshon na konservashon i mantenshon di nos naturalesa.  Nos mester di nos naturalesa den nos kresementu i ku tambe ta kontribuí na desaroyo ekonómiko. Komo último a pidi atenshon spesial pa e problema di migrantenan den paisnan bisiña ku ta pasando tempunan difísil. Boneiru ta un isla ku tin espasio i pa evaluá i konsiderá tur posibilidat pa kompartí esaki ku famianan di otro paisnan  ku ta den problema, si nos lei i reglanan ta permití esaki.

Kolegio Ehekutivo a duna splikashon riba kada tópiko. Nunsio Apostóliko Arsobispu Fortunatus Nwachukwu tabata satisfecho ku e kombersashonnan ku a hiba ku miembronan di Kolegio Ehekutivo i a gradisí pa e amabilidat di por a risibí su bishita.

 

Contact
Bestuurskantoor Openbaar Lichaam Bonaire
Plasa Reina Wilhelmina 1
Kralendijk
T +599 717 5330

Klik hier voor de contactgegevens van alle diensten van het OLB